Mimoza Kaçi propozohet si Drejtore e Përgjithshme e AMF! Jetëshkrimi

Mimoza Kaçi është propozuar nga Këshilli i Ministrave si Drejtor i Përgjithshëm Ekzekutiv i Autoritetit të Mbikëqyrjes Financiare. Propozimi që Këshilli i Ministrave i ka bërë Kuvendit është që zonja Kaçi, aktualisht anëtare e Bordit të Autoritetit të Mbikëqyrjes Financiare, e cila mban funksionin e nëndrejtorit Ekzekutiv, të lirohet nga ky funksion dhe të emërohet në funksionin e drejtorit të Pëgjithshëm Ekzekutiv të Autoritetit, për periudhën e mbetur të mandatit si anëtare e bordit.

Mimoza Kaçi ka mbajtur deri më tani detyrën e Nëndrejtores Ekzekutive dhe Anëtares së Bordit të Autoritetit të Mbikëqyrjes Financiare, e emëruar nga Kuvendi i Shqipërisë në dhjetor 2014 me një mandat katër vjeçar. Ajo është gjithashtu anëtare e Komitetit të Implementimit dhe Vlerësimit në Shoqatën Ndërkombëtare të Rregullatorëve të Sigurimeve (IAIS Implementation and Assessment Committee), raporton SCAN.

Znj. Kaçi ka përvojë të gjatë pune në administratën publike dhe në sektorin akademik. Përfshirja e saj në fushën akademike ka filluar si Pedagoge në Fakultetin e Ekonomisë, Universiteti i Tiranës duke vijuar më tej në Universitetin Europian të Tiranës, si Pedagoge në Departamentin e Financës. Znj. Kaçi është diplomuar në Universitetin e Ekonominë dhe Biznesit, Vjenë, Austri, me profil tregjet e kapitaleve dhe sigurimeve. Ajo mban titullin Doktor i Shkencave nga Fakulteti i Ekonomisë, Universiteti i Tiranës. Znj. Kaçi është kontribuuese në kërkimin shkencor nëpërmjet një sërë botimesh në fushën ekonomike si edhe prezantimesh në konferenca kombëtare dhe ndërkombëtare, brenda dhe jashtë vendit.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.