Bursat europiane tentojnë rimëkëmbjen – FED sinjalizon se politika monetare do të jetë kufizuese
Bursat europiane po tentojnë rimëkëmbjen në sesionin e sotëm, pasi investitorët e kanë mirëpritur procesverbalin e takimit të fundit të Rezervës Federale. Edhe fitimet tremujore mbi parashikimet e analistëve të Nvidia kanë ndihmuar në përmirësimin e humorit të tregjeve. Indeksi pan-Europian Stoxx 600 po qëndron në rritje me rreth 0.4%, ndërsa shumica e sektorëve janë në territor pozitiv.
Ndërkohë, kompania e softuerëve në Mbretërinë e Bashkuar, Sage është në rritje me rreth 10%, pasi raportoi një rritje të fortë të fitimimeve operative dhe njoftoi një program prej 350 milion paund për blerjen mbrapsht të aksioneve.
Në procesverbalin e takimit të Rezervës Federale thuhet se zyrtarët mendojnë që politika monetare duhet të jetë kufizuese. “Në diskutimin e fundit, politikëbërësit vazhduan të gjykojnë se është kritike që qëndrimi i politikës monetare të mbahej mjaft kufizues për ta kthyer inflacionin në objektivin prej 2%,” thuhet në procesverbal.
Norma bazë e interesit në SHBA aktualisht qëndron në 5.25%-5.5%. Për sa i përket korporatave, fitimet dhe të ardhurat e Nvidia për tremujorin e tretë rezultuan mbi parashikimet e tregjeve, por aksionet ranë me rreth 1%, pasi kompania tha se kufizimet e eksporteve në Kinë do të ndikojnë në tremujorin e katërt të vitit.
Ndër zhvillimet e tjera, ministri i Financave në Mbretërinë e Bashkuar, Jeremy Hunt, prezantoi buxhetin e tij të quajtur “Deklarata e Vjeshtës”, mes presionit nga brenda Partisë Konservatore në pushtet për të aplikuar ulje taksash ndërsa ekonomia është në stanjacion.
Hunt shpalli disa masa për tërheqjen e investimeve të bizneseve dhe heqjen e pengesave ndaj projekteve të infrastrukturës, ndërsa është nën presion nga e drejta e partisë së tij për të miratuar ulje taksash.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.