“Minibuxheti, jo shkaktar i kaosit në tregje” – Komentet e ministrit britanik të biznesit, pas kritikave për strategjinë e rritjes së ekonomisë

Ministri britanik i biznesit, Jacob Rees-Mogg, tha se “mini-buxheti” i qeverisë nuk shkaktoi trazirat në tregjet e bonove, ndërsa akuzoi FMN për një paragjykim anti-britanik dhe hodhi dyshime mbi të dhënat zyrtare që tregojnë se ekonomia është tkurrur.

Komentet e tij tërhoqën kritika, në një kohë kur qeveria konservatore e sapoformuar e Liz Truss po përpiqet të forcojë besueshmërinë me investitorët ndërkombëtarë dhe të rivendosë besimin në ekonomi.

Rees-Mogg, dha disa intervista për të hedhur poshtë kritikat se qeveria shkaktoi një trazirë në tregun e obligacioneve duke njoftuar 45 miliardë paund ulje taksash të financuara nga huamarrja më e lartë.

Përpara se të përfshihej në politikë, Rees-Mogg ngriti një firmë investimesh në tregjet në zhvillim dhe ishte në krye të akuzës që Britania të largohej nga Bashkimi Europian. Emërimi i tij në një rol të lartë ministror nga kryeministrja Liz Truss, u prit me skepticizëm nga disa drejtues biznesi.

Një ditë para deklaratës fiskale të uljes së taksave, Banka e Anglisë rriti normat e interesit me më pak se homologja e saj në SHBA. Që nga ajo periudhë, Banka Qendrore duhet të ndërhynte për të stabilizuar tregjet, pasi rënia e mprehtë e bonove të qeverisë britanike kërcënoi fondet e pensioneve, të cilat mbajnë sasi të mëdha të bonove të vjetra.

Pak ditë më parë Fondi Monetar Ndërkombëtar, si rrallë herë ka kritikuar politikën ekonomike të një vendi anëtar të G7. Rees-Mogg u përgjigj duke thënë se FMN “normalisht nuk ishte një mik i kësaj qeverie”.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.