Musk sfidon ChatGPT – Miliarderi krijon platformën e tij të Inteligjencës Artificiale

Miliarderi Elon Musk tha se do të krijojë një platformë të inteligjencës artificiale që ai e quan “TruthGPT”, në një sfidë të dukshme ndaj ChatGPT, chatbot – i popullor nga OpenAI. Ai theksoi se “TruthGPT”, do të jetë një Inteligjencë Artificiale që kërkon të vërtetën maksimale dhe përpiqet të kuptojë natyrën e universit. Sipas tij kjo do të jetë rruga më e mirë drejt sigurisë, në kuptimin që një IA që kujdeset për të kuptuar universin, dhe nuk ka gjasa të asgjësojë njerëzit sepse ne jemi një pjesë interesante e universit.

Musk ka nisur kërkime për ekspertë të inteligjencës artificiale nga Google e Alphabet për të nisur një startup për të rivalizuar OpenAI-n. Musk muajin e kaluar regjistroi një firmë të quajtur X.AI me qendër në Nevada. Firma listoi Musk si drejtor të vetëm dhe Jared Birchall, drejtorin menaxhues të zyrës së familjes së Musk, si sekretar. Kjo ndodhi pasi Musk dhe një grup ekspertësh të inteligjencës artificiale dhe drejtues të industrisë kërkuan një pushim gjashtëmujor në zhvillimin e sistemeve më të fuqishme se GPT-4 i sapolançuar i OpenAI, duke përmendur rreziqe të mundshme për shoqërinë.

Musk gjithashtu përsëriti paralajmërimet e tij për Inteligjencën Artificiale gjatë një interviste duke thënë se “Inteligjenca artificiale është më e rrezikshme sesa, të themi, keqmenaxhimi i dizajnit të avionit ose mirëmbajtja e prodhimit ose prodhimi i keq i automjeteve”.

Musk bashkëthemeloi OpenAI në vitin 2015, por ai u largua nga bordi i kompanisë në vitin 2018. Në vitin 2019, ai postoi në Twitter se u largua nga OpenAI sepse duhej të fokusohej në Tesla dhe SpaceX. Musk, CEO i Tesla dhe SpaceX, është bërë gjithashtu CEO i Twitter, një platformë e mediave sociale që e ka blerë për 44 miliardë dollarë vitin e kaluar.

Në janar, Microsoft njoftoi një investim të mëtejshëm shumë miliardë dollarësh në OpenAI, duke intensifikuar konkurrencën me rivalin Google dhe duke nxitur garën për të tërhequr fonde të AI në Silicon Valley.

Dorina Kurtaj /SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.