Nafta, e qëndrueshme në mbi 74 USD – Mbështetet nga rënia e rezervave në SHBA me 9.6 mln fuçi, javën e kaluar

Nafta po tregtohet e qëndrueshme edhe në sesionin e fundit të kësaj jave, pas fitimeve të realizuara një ditë më parë. Çmimet po gjejnë një mbështetje nga rënia e rezervave të naftës në SHBA, javën e kaluar, dhe nga pritshmëritë se OPEC+ do të ulë prodhimin duke filluar nga korriku.

Nafta Brent e Londrës po tregtohet në mbi 74 dollarë për fuçi, ndërsa nafta Bruto amerikane po tregtohet në rreth 69 dollarë për fuçi. Të dyja kontratat u rritën ndjeshëm në sesionin e kaluar, ndërsa gjatë muajit qershor pritet të publikojnë fitime prej rreth 2%. Megjithatë, investitorët janë të shqetësuar për ngadalësimin e kërkesës, si pasojë e rritjes së interesave nga bankat qendrore më të mëdha të botës.

Referuar të dhënave në SHBA, Administrata për Informimin mbi Energjinë njoftoi se rezervat e naftës bruto ranë me 9.6 milionë fuçi, gjatë javës që u mbyll më 23 qershor, ndërsa analistët parashikonin një rënie me 1.8 milionë fuçi. Ndërkohë, duke filluar nga muaji korrik, Arabia Saudite planifikon të ulë prodhimin edhe me 1 milionë fuçi naftë në ditë, duke tkurrur më shumë furnizimin e tregut.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.