Nafta, e qëndrueshme pranë 87 USD – Volum i ulët për shkak të Vitit të Ri Hënor në Azi
Nafta po tregtohet e qëndrueshme në sesionin e sotëm, ndërsa volumi i shkëmbimeve tregtare është i ulët për shkak se shumica e tregjeve në Azi janë pushim me rastin e Vitit të Ri Hënor. Megjithatë, Brenti i Londrës po tregtohet pranë 87 dollarëve për fuçi dhe në kohët e fundit është mbështetur nga pritshmëritë se kërkesa do të rimëkëmbet ndjeshëm në Kinë.
Nafta Bruto amerikane po tregtohet në rreth 81 dollarë për fuçi. Javën e kaluar, nafta Brent u rrit me rreth 2.8%, ndërsa nafta Bruto u rrit me rreth 1.8%. Analistët shprehen se optimizmi për rihapjen e ekonomisë kineze dhe sanksionet e BE ndaj naftës ruse do të vijojnë të mbështesin çmimet.
Sipas të dhënave, heqja e kufizimeve të Covid-19 në Kinë e ka rritur trafikun me rreth 22% në 15 qytetet kryesore. Edhe Agjencia Ndërkombëtare e Energjisë parashikon se për shkak të këtyre dy faktorëve, furnizimi i tregut të naftës do të tkurret gjatë këtij viti. Ndërkohë, duke filluar nga 5 shkurti, Bashkimi Europian dhe G7-a do të vendosin tavan mbi çmimet e produkteve të rafinuara të naftës ruse.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.