Nafta i rikthehet fitimeve – Mbështetet nga shenjat se kërkesa në SHBA vijon të jetë e fortë

Nafta po qëndron në rritje në sesionin e sotëm, pasi kërkesa e lartë për karburante në Shtetet e Bashkuara ka larguar shqetësimet në lidhje me mundësitë e një falimentimi në pagesat e borxhit. Nafta Brent e Londrës po tregtohet në rreth 76.5 dollarë për fuçi, ndërsa nafta Bruto amerikane po tregtohet në rreth 73 dollarë për fuçi.

Të dhënat më të fundit në SHBA treguan se, çmimet konsumatore u rritën gjatë prillit, por me një hap më të ngadaltë se parashikimet e analistëve. shtrëngimi i politikave monetare në të gjithë botën ka ngadalësuar rritjen ekonomike, për rrjedhojë edhe kërkesën për naftë. Referuar të dhënave zyrtare të publikuara nga Administrata për Informimin mbi Energjinë në SHBA rezervat e naftës bruto ranë me 3.2 milionë fuçi, gjatë javës së kaluar, kundrejt parashikimeve të analistëve për një rënie me 1.2 milionë fuçi.

Në fokus të tregjeve janë edhe diskutimet në kongresin amerikan për rritjen e tavanit të borxhit prej 31.4 trilionë dollarë dhe takimi i radhës do të zhvillohet të premten.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.