Nafta, në rënie modeste – Rezervat në SHBA rriten me 14.9 milionë fuçi, javën e kaluar
Nafta po qëndron në rënie të lehtë në sesionin e sotëm, pasi të dhënat e industrisë në SHBA treguan një rritje surprizë të rezervave gjatë javës së kaluar, që kanë rikthyer shqetësimet për ngadalësimin e kërkesës. Megjithatë, tregjet po presin të dhënat zyrtare që publikohen më vonë gjatë ditës së sotme nga Administrata për Informimin mbi Energjinë.
Nafta Brent e Londrës po tregtohet në rreth 79 dollarë për fuçi, ndërsa nafta Bruto amerikane po tregtohet në rreth 74 dollarë për fuçi. Referuar të dhënave jozyrtare të Institutit Amerikan të Naftës, rezervat e naftës në SHBA u rritën me 14.9 milionë fuçi, gjatë javës që u mbyll më 6 janar, ndërsa karburantet e distiluara u rritën me 1.1 milionë fuçi. Analistët e anketuar nga Reuters parashikonin një rënie të rezervave të naftës bruto me 2.2 milionë fuçi.
Tregu i naftës është gjendur nën presion në ditët e para të këtij viti, për shkak të rritjes së pritshmërive se Rezerva Federale do të vijojë me politikën monetare agresive. Por, humbjet janë kufizuar nga shpresat se kërkesa do të rritet ndjeshëm në Kinë, për shkak të heqjes së masave kufizuese për herë të parë në 3 vitet e fundit.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.