Dollari, në nivelin më të ulët në 7 muaj – Investitorët presin të dhënat mbi inflacionin në SHBA

Dollari po shfaqet i qëndrueshëm, gjatë sesionit të sotëm, pasi investitorët po presin të dhënat mbi inflacionin në SHBA për dhjetorin, për të parë nëse është ngadalësuar rritja e çmimeve. Monedha e gjelbër vijon të tregtohet në nivelin më të ulët në 7 muajt e fundit, në raport me euron, në rreth 1.0737.

Dollari ka humbur rreth 11% të vlerës, që kur preku nivelin më të lartë në 20 vitet e fundit në shtator të vitit të kaluar, pasi investitorët filluan të vlerësonin se Rezerva Federale do të ngadalësojë rritjen e interesave.

Ndërkohë, shefi i Rezervës Federale, Jerome Powell nuk tha ndonjë detaj mbi politikat monetare në të ardhmen, gjatë një fjalimi që mbajti në Stockholm, por shtoi se politikat monetare do të varen nga të dhënat mbi inflacionin. Njëkohësisht, rihapja e Kinës për herë të parë në tre vitet e fundit ka shtuar oreksin për asete me risk, duke bërë që investitorët të largohen nga asetet e sigurta, ku bën pjesë edhe dollari amerikan.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.