Nafta ngjitet në mbi 76 USD për fuçi – Mbështetet nga optimizmi për rritjen e tavanit të borxhit
Nafta i është rikthyer fitimeve në sesionin e sotëm, pas humbjeve me rreth 2% në sesionin e kaluar, kryesisht për shkak të forcimit të dollarit amerikan, por edhe shpresave për rimëkëmbjen e kërkesës. Nafta Brent e Londrës po tregtohet pranë 76 dollarëve për fuçi, ndërsa nafta Bruto amerikane po tregtohet në rreth 72 dollarë për fuçi. Një dollar më i fortë mund të ndikojë në kërkesën për naftë, pasi e bën më të shtrenjtë për zotëruesit e monedhave të tjera.
Megjithatë, të dhënat pozitive mbi ekonominë amerikane për prillin dhe optimizmi për një marrëveshje mbi rritjen e tavanit të borxhit në SHBA kanë mbështetur çmimet. Marrëveshja për rritjen e tavanit të borxhit duhet të firmoset përpara datës 1 qershor, në të kundërt qeveria nuk do të ketë mundësi të paguajë detyrimet e saj. Ndër zhvillimet e tjera, zëvëndëspresidenti i Bankës Qendrore Europiane, Luis de Guindos, deklaroi se institucioni do të rrisë më tej normat e interesit për ta ulur inflacionin brenda objektivit pranë 2%.
Në kahun e furnizimit të tregut, eksportet e naftës nga Arabia Saudite u rritën me 1%, gjatë marsit, në 7.52 milionë fuçi naftë në ditë. Në tregun e metaleve të çmuara, ari po tregtohet në rreth 1970 dollarë, ndërsa argjendi po tregtohet në rreth 23.9 dollarë për onz.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.