Nafta ngjitet pranë 75 USD për fuçi – Mbështetet nga votimi i tavanit të borxhit. Në fokus, takimi i OPEC+

Nafta është rritur në sesionin e sotëm dhe po mbështetet nga votimi i projektligjit për pezullimin e tavanit të borxhit në SHBA prej 31.4 trilionë dollarë. Gjithashtu, në fokus të investitorëve është edhe takimi i OPEC+, që zhvillohet këtë fundjavë në Vjenë.

Nafta Brent e Londrës po tregtohet në rreth 75 dollarë për fuçi, ndërsa nafta Bruto amerikane po tregtohet në rreth 71 dollarë për fuçi. Tregu është mbështetur nga votimi i tavanit të borxhit në të dyja dhomat e Kongresit amerikan, duke shmangur një falimentim katastrofik të ekonomisë amerikane. Tashmë që shqetësimi i tavanit të borxhit u largua, me interes po pritet takimi i OPEC dhe aleatëve të tjerë më 4 qershor.

Ministrat e vendeve më të mëdha prodhuese do të vendosin në lidhje me politikat e prodhimit në të ardhmen, në një kohë që tendenca e çmimeve ka qenë në rënie që nga mesi i prillit. Megjithatë, Rusia ka deklaruar se nuk do të mbështesë një propozim të Arabisë Saudite, për të ulur më tej kuotat e prodhimit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.