Nafta rritet në mbi 74 USD – Mbështetet nga vendimi i Kinës për të ulur normën e huadhënies

Nafta po tregtohet e qëndrueshme në sesionin e sotëm pas fitimeve të realizuara një ditë më parë. Investitorët po presin takimin e Rezervës Federale, më vonë gjatë ditës së sotme, takimin e Bankës Qendrore Europiane të enjten dhe disa të dhëna kyçe për ekonominë kineze. Nafta Brent e Londrës po tregtohet në rreth 74.5 dollarë për fuçi, ndërsa nafta Bruto amerikane po tregtohet në rreth 69.5 dollarë për fuçi.

Të dyja kontratat u rritën me më shumë se 3% në sesionin e kaluar, për shkak të shpresave se kërkesa do të rimëkëmbet në Kinë sepse Banka Qendrore uli normën afatshkurtër të huadhënies. Në fokus të tregjeve do të jetë edhe takimi i Bankës së Japonisë të enjten dhe analistët parashikojnë se do të mbajë të pandryshuar politikën e saj ultra lehtësuese.

Referuar të dhënave të Institutit Amerikan të Naftës, rezervat e naftës bruto në SHBA u rritën me 1 milionë fuçi, gjatë javës që u mbyll më 9 qershor, ndërsa analistët parashikonin një rënie me rreth 500 mijë fuçi. Megjithatë, tregjet po presin të dhënat zyrtare që do të publikohen më vonë gjatë ditës së sotme nga Administrata për Informimin mbi Energjinë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.