Ndryshimet klimatike kushtojnë 391 milionë USD në ditë – Humbje të konsiderueshme nga pasojat e ngjarjeve ekstreme të motit

Kriza klimatike, një nga sfidat më të mëdha të epokës moderne, po shkakton reaksione zinxhir, nga jeta jonë e përditshme në ekonominë globale, siç zbulohet nga një raport i ri që zbulon kostot e sakta të saj. Ndërsa vendet përpiqen të arrijnë gradualisht emetimet zero të karbonit, është zbuluar se bota ka ‘humbur’ 391 milionë dollarë në ditë gjatë dy dekadave të fundit për shkak të ndryshimeve klimatike.

Sipas të dhënave kërkimore të publikuara në revistën shkencore ‘Nature Communications’, zjarret, valët e të nxehtit, thatësirat dhe ngjarje të tjera ekstreme që i atribuohen ndryshimeve klimatike janë shkaqet kryesore të kësaj krize dhe humbjeje. Raporti thekson se 143 miliardë dollarë në vit nga kostoja e ngjarjeve ekstreme i atribuohen ndryshimeve klimatike. Shumica e tyre, pra 63%, janë për shkak të humbjes së jetëve njerëzore. Viti me humbjet më të mëdha ishte viti 2008, i ndjekur nga 2003 dhe më pas 2010.

Beteja e stërzgjatur në botë me motin ekstrem po bëhet gjithnjë e më e vështirë për t’u përballuar, veçanërisht pasi temperaturat vazhdojnë të rriten dhe fatkeqësitë intensifikohen. Planeti përjetoi verën më të nxehtë të regjistruar këtë vit, duke e bërë vitin 2023 vitin më të nxehtë të regjistruar deri më tani. Hemisfera Veriore përjetoi valë të përsëritura të të nxehtit, me zjarre shkatërruese nga Europa në SHBA. Për më tepër, për herë të parë në katër vjet, fenomeni “El Niño” , i cili filloi në qershor, pritet të jetë i fortë këtë dimër.

Humbjet u llogaritën duke kombinuar të dhënat e tyre ekonomike me atë se sa ngrohja globale ka përkeqësuar ‘modelet’ e motit. Hulumtimi, megjithatë, vë në dukje se kostot e vërteta të ndryshimeve klimatike ka të ngjarë të nënvlerësohen, për shkak të vështirësisë së matjes së humbjeve indirekte. Shembujt e përmendur përfshijnë humbjet e produktivitetit që vijnë nga vala e të nxehtit, ndikimi i shëndetit mendor te njerëzit ose humbja e aksesit në arsim dhe punë nëse një vend pune shkatërrohet. Mungesa e të dhënave nga vendet me të ardhura më të ulëta mund të rrisë gjithashtu kostot aktuale.

Sondazhi gjithashtu vendos vlerën e humbjes për jetë në 7.08 milionë dollarë, bazuar në vlerësimet e përdorura nga Agjencia Federale e Menaxhimit të Emergjencave të SHBA. Qeveritë arritën marrëveshjen e Parisit për klimën në vitin 2015 me synimin për të kufizuar ngrohjen globale nën 2 gradë Celsius në krahasim me nivelet para-industriale dhe përpjekjet e vazhdueshme për të kufizuar rritjen e temperaturave. Ky synim, megjithatë, është pothuajse i pamundur të arrihet, sipas ekspertëve.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.