Ndryshojnë tarifat për ankesat e tenderëve – Vendimi i qeverisë për operatorët ekonomikë: Niveli, sipas llojit të ankesës

Qeveria, ka ndryshuar tarifat që duhet të paguajnë operatorët ekonomikë, në rast të kundërshtimit të kritereve apo vlerësimit të ofertave në një procedurë tenderuese. Sipas vendimit të ri, kur ankesa paraqitet për dokumentet e tenderit, është sa 0.4 % e vlerës së procedurës së prokurimit që ankimohet, ndërkohë që kur ankesa paraqitet për vendimin e vlerësimit, klasifikimit përfundimtar ose vendimin e përzgjedhjes së kandidatëve pas fazës së parakualifikimit, është sa 0.5 % e vlerës së procedurës së prokurimit që ankimohet.

Po ashtu, vendimi përcakton se kur ankesa paraqitet për pavlefshmërinë e kontratës, tarifa që do të duhet të paguhet është 0.5 % e vlerës së kontratës së nënshkruar. Vendimi i deritanishëm parashikonte se për shqyrtimin e ankesës nga KPP-ja, pagesa ishte 0.5% e vlerës së fondit limit në procedurën e prokurimit, që ankimohet. Parapagimi i tarifës nga operatori ekonomik ankimues ose operatori ekonomik i interesuar është kusht i domosdoshëm për pranimin dhe shqyrtimin e ankesës.

Në rastet e moskryerjes së pagesës, autoritetit ose entit kontraktor dhe Komisionit të Prokurimit Publik i lind e drejta e mospranimit të ankesës së paraqitur. Ankesa për një procedurë tenderuese bëhet nga çdo operator ekonomik, i cili ka ose ka pasur interes në një procedurë prokurimi dhe kur është dëmtuar ose rrezikohet të dëmtohet nga veprimet ose mosveprimet e autoritetit ose entit kontraktor.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.