Në lupë pagesat elektronike, nga 2024 autentifikim i thelluar – Subjektet do të detyrohen të verifikojnë minimalisht dy elementë të paguesit

Nga 1 janari 2024, subjektet që do ofrojnë shërbimet e pagesave elektronike do jenë të detyruara të përdorin sistemin e autentifikimit të thelluar. Rregullorja Bankës së Shqipërisë thekson se ky sistem do të nisë të aplikohet nga 1 janari i vitit të ardhshëm. Në thelb rregullorja përcakton se autentifikimi i thelluar duhet të bazohet në dy ose më shumë elementë të pavarur. Nga ana tjetër, kodi i autentifikimit duhet të pranohet vetëm një herë nga ofruesi i shërbimeve të pagesave, në rastet kur paguesi përdor kodin e autentifikimit për të aksesuar hyrë në llogarinë e tij të pagesës online, për të iniciuar një transaksion elektronik pagese.

Po ashtu, numri i tentativave të dështuara të autentifikimit që mund të ndodhin njëra pas tjetrës, pas së cilave bllokohet përkohësisht ose përgjithmonë aksesi, nuk duhet të jetë më shumë se pesë. Dhe pasi përdoruesi të jetë autentifikuar për të aksesuar online në llogarinë e tij të pagesës, koha maksimale pa aktivitet nuk duhet të kalojë pesë minuta.

Numri i pagesave me para elektronike ka shënuar një rritje të konsiderueshme si në numër dhe në vlerë gjatë vitit 2022, duke arritur në një total prej afro 450 milionë dollarë. Sipas të dhënave zyrtare të Bankës së Shqipërisë, numri i pagesave është rritur me 50% krahasuar me një vit më parë, ndërsa vlera e tyre me 190%.

Përgjatë vitit 2022, në tregun shqiptar kanë operuar 9 institucione të parasë elektronike, nga 7 të tilla në fund të vitit 2021. Rritja e numrit të institucioneve të parasë elektronike ka ardhur edhe si efekt i miratimit të ligjit “Për shërbimet e pagesave”. Shtimi i institucioneve të parasë elektronike ka sjellë edhe një shtrirje më të gjerë të terminaleve që ato vënë në dispozicion të klientëve të tyre (si atyre fizikë dhe virtualë), konkretisht me një rritje të konsiderueshme prej 123.3% krahasuar me fundin e vitit 2021.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.