Nga optimizmi në realizëm – Përbërësit kryesorë për rimëkëmbjen globale nuk funksionojnë si pritej

Ekonomia globale po tregon shenja të reja ngadalësimi pasi rimëkëmbja e Kinës pas koronavirusit duket se po lëkundet, ndërsa sektori industrial i Gjermanisë po lufton dhe kërcënon të tërheqë ekonominë më të madhe të Europës në recesion. Këto dobësi vijnë pasi ekonomia ende elastike e SHBA-së është nën presionin e trazirave më të këqija bankare që nga fillimi i krizës financiare, si dhe ngërçit mbi tavanin e borxhit.

Sekretarja amerikane e Thesarit Janet Yellen paralajmëroi të martën se koha po mbaron për të shmangur katastrofën. Të dhënat më të fundit tregojnë se përbërësit kryesorë që çojnë në një rikuperim global nuk duket se funksionojnë siç pritej. Hapja e ekonomisë kineze, pas politikës së rasteve zero, nuk nisi fuqishëm, ndërkohë që dimri i butë nuk mjaftoi për të ringjallur sektorin industrial në Gjermani.

Analistët shprehen se optimizmi për rritjen në fillim të vitit është zëvendësuar qartë nga një ndjenjë realizmi. Ose thjesht zhgënjim. Kina dhe Europa tashmë kanë filluar të humbasin sërish vrullin dhe me atë që po ndodh në SHBA tani , gjysma e dytë e vitit nuk duket më mirë..

Vazhdimi i dobësimit në sektorin e pasurive të paluajtshme nuk do të ndryshojë shumë situatën. Në të njëjtën kohë, indeksi që mat besimin e investitorëve ra për të tretin muaj radhazi, duke ringjallur frikën për një recesion të mundshëm. Indeksi i pritshmërive të biznesit të Institutit Zeë ra në -10.7 pikë në maj nga -4.1 pikë në prill. Përpara të dhënave, një rënie e papritur e prodhimit industrial nxiti shqetësimin se ekonomia më e madhe e Europës po tregonte shenja ngadalësimi. Nga ana e saj, FMN muajin e kaluar rishikoi vlerësimet e saj për rritjen e ekonomisë botërore këtë vit.

Gjithashtu të martën, FMN paralajmëroi se shtrëngimi i politikës monetare dhe çmimet e larta të energjisë po rëndojnë mbi ekonominë e Gjermanisë. Për më tepër, ajo parashikon që rritja e saj “do të jetë afër zeros në 2023”, përpara se të fillojë të forcohet në tre vitet e ardhshme.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.