Ngadalësohet rritja ekonomike në SHBA – Tremujori i parë regjistroi shifra të “zbehta”

Rritja ekonomike e Shteteve të Bashkuara të Amerikës u ngadalësua në një normë vjetore dhe të rregulluar sezonale prej 1.1% në tremujorin e parë të këtij viti, pasi bizneset ribalancuan inventarët e tyre dhe u tërhoqën nga shpenzimet mes rritjes ‘ndëshkuese’ të normave nga Rezerva Federale. Rritja e produktit të brendshëm bruto – masa më e gjerë e aktivitetit ekonomik – ishte shumë më poshtë se pritshmëritë e ekonomistëve prej 2% dhe përfaqëson një ritëm më të moderuar krahasuar me dy tremujorët e mëparshëm, sipas të dhënave të publikuara nga Departamenti i Tregtisë.

Periudha janar-mars u shënua gjithashtu në javët e saj të mëvonshme nga frika në rritje se një shkrirje në sektorin bankar dhe një krizë në pritje e tavanit të borxhit mund të shkaktojnë një recesion. Raporti i PBB-së pohon se ekonomia amerikane ka humbur vrullin në muajt e fundit, me shumë ekonomistë që parashikojnë gjithashtu një recesion më vonë gjatë vitit. Rezerva Federale është përpjekur me muaj të tërë për të ftohur ekonominë, e cila ka mbetur e fortë pavarësisht nëntë rritjeve të njëpasnjëshme të normës.

Shpenzimet konsumatore, të cilat përbëjnë më shumë se dy të tretat e prodhimit ekonomik, kontribuan më së shumti në rritjen e tremujorit të parë pasi amerikanët vazhduan të shpenzojnë fuqishëm për mallra dhe shërbime, veçanërisht në restorante dhe bare. Shpenzimet ishin më të forta krahasuar me tremujorin e mëparshëm, të udhëhequra nga blerjet e makinave dhe pjesëve të automjeteve dhe shërbimet e kujdesit shëndetësor. Ndërkohë, rritja e importeve dhe rënia e ndjeshme e inventarëve zvarritën rritjen.

Megjithatë, inflacioni i lartë dhe fushata njëvjeçare e rritjes së normave të Rezervës Federale ndikuan mbi shpenzimet e biznesit, të cilat ranë në fillim të vitit. Investimet rezidenciale dhe jorezidenciale ranë për të katërtin tremujor radhazi.

Aktiviteti i fuqishëm ekonomik në janar ndihmoi në nxitjen e rritjes së përgjithshme në tremujorin e parë, thanë ekonomistët. Në janar, shpenzimet konsumatore u rritën me 2% dhe punëdhënësit shtuan afër gjysmë milioni vende pune. Rritja e shpenzimeve dhe e listës së pagave u ftohën në muajt në vijim pasi inflacioni, kostot më të larta të huamarrjes dhe moti më i ftohtë rënduan mbi prodhimin. 236 mijë vende pune të shtuara në mars ishte fitimi më i vogël mujor në më shumë se dy vjet dhe shpenzimet e familjeve u rritën me një modeste prej 0.2% në shkurt.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.