SHBA shndërron zyrat e braktisura në ambiente banimi – Qiraja, apo shitja duhet të jetë nën koston aktuale të tregut

Në të gjithë SHBA-në, ndërtesat e zyrave po shndërrohen në apartamente jo vetëm për të ofruar strehim të përballueshëm, por edhe për të nxitur ekonominë lokale të zonave në qendër të qytetit. Pandemia, bllokimet dhe puna nga shtëpia ka ndikuar shumë në këto zona të cilat nuk do të mund të rimëkëmben asnjëherë plotësisht. Për këtë qëllim, autoritetet e shumë qyteteve ofrojnë lehtësira të konsiderueshme tatimore për kompanitë kontraktuese për të inkurajuar projektet e konvertimit nga zyra në apartament me kushtin që një pjesë e këtyre apartamenteve të shiten ose të jepen me qira me çmime të përballueshme, nën normat e blerjes.

Në janar, Pittsburgh nisi një proces tenderimi për të ndërtuar banesa të përballueshme përmes “konvertimit të hapësirës së vjetër dhe të papërdorur të zyrave”. Bostoni njoftoi gjithashtu një plan të ngjashëm në tetor, që synon rigjallërimin e jetës ekonomike të qendrës së qytetit përmes shndërrimit të zyrave në rezidenca. Dhe në prill, Seattle shpalli një konkurs midis pronarëve të pronave dhe firmave të projektimit për të paraqitur propozime për konvertimin e zyrave në shtëpi.

Kryebashkiaku i Uashingtonit, i ka bërë konvertimet e zyrave një gur themeli të planit të saj për të rigjallëruar jetën dhe aktivitetin ekonomik në qendër të qytetit. Plani i shpallur në fillim të këtij viti, synon të tërheqë 15 mijë banorë të rinj në qendrën e qytetit, ku tani jetojnë 25 mijë njerëz.

Gjithë kjo ethe e shndërrimit të zyrave në rezidenca, megjithatë, merr edhe kritika të ashpra. Organizatat që bëjnë thirrje për strehim të përballueshëm shprehin frikën se plani do të anulohet nga qëllimi i tij fillestar dhe synimi për strehim të përballueshëm do të braktiset.

Megjithatë, mbështetësit e modelit të konvertimit theksojnë se lehtësirat tatimore për kontraktorët e pasur nuk janë mënyra më e mirë për të arritur qëllimin. Dhe ndërsa më shumë punëdhënës fillojnë të kalojnë në modelin hibrid të punës, lind pyetja nëse njerëzit do të duan të vendosen në zonat qendrore të qytetit nëse nuk do iu duhet të jenë atje çdo ditë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.