Nis asfaltimi i rrugës Shkozet-Mbikalimi i Plepave – ARRSH lidh kontratën 94.6 mln lekë në segmentin me gjatësi 4.2 km

Aksi rrugor nga nyja e Shkozetit deri të Mbikalimi i Plepave do t’i nënshtrohet punimve për sistemimin dhe asfaltimin e tij, teksa Autoriteti Rrugor Shqiptar ka lidhur kontratën me kompaninë që do të duhet të përfundojë punimet brenda datës 2 tetor të këtij viti.

Tenderin për këtë segment, që konsiderohet si tejet i rëndësishëm, sidomos gjatë sezonit veror, për shkak të numrit të lartë të automjetete që shkojnë drejt jugut të vendit, u hap në korrik të këtij viti, ndërkohë që kontrata e nënshkruar me kompaninë A.L-ASFALT, kap vlerën e 94.6 mln lekë, me TVSH.

Gjatë shpalljes së tenderit, u bë me dije se ndërhyrja do të kryhet përgjatë një gjatësie prej 4.2 km, teksa gjendja aktuale e rrugës përshkruhej si tejet e amortizuar, duke qenë se shtresat asfaltike janë të dëmtuara. Sipas ARRSH ky segment, pjesë e anashkalimit të Durrësit, është shumë i rëndësishëm, pasi shërben për lidhjen e superstradës Tiranë – Durrës nga Nyja e Shkozetit deri në Mbikalimin e Plepave ku lidhet me rrugën Tiranë – Ndroq – Plepa dhe rrugën Plepa – Kavajë – Rrogozhinë.

Ndërkohë që, të gjitha mjetet e zonës së veriut që lëvizin drejt jugut dhe ato të Portit të Durrësit kalojnë në këtë segment rrugor. Rruga kalon nëpër një zonë të dendur urbane dhe i nënshtrohet një trafiku të rënduar ku një pjesë të madhe e zë trafiku i mjeteve të rënda.

Ola Mitre /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.