Nokia shkurton 14 mijë vende pune – Rënie rekord të fitimeve, sidomos në Amerikën e Veriut

Nokia konfirmoi shkurtimin e 14 mijë vende pune në kuadër të planit për uljen e kostove pas rënies së të ardhurave të regjistruar në tremujorin e tretë.

Gjigandi finlandez i telekomunikacionit tha se do të reduktojë bazën e tij të kostos dhe do të rrisë efikasitetin e operimit për tu përballur më mirë me mjedisin sfidues të tregut. Objektivi mbetet ulja e bazës së kostos bruto nga viti 2023 me 800 milionë euro dhe 1.2 miliardë euro deri në fund të 2026-ës.

Kjo do të zvogëlojë numrin e të punësuarve aktualisht nga 86 mijë deri në 72 mijë. Pushimet masive nga pune po ndërmerren pasi Nokia raportoi se shitjet neto të tremujorit të tretë ranë 20% nga viti në vit në 4.98 miliardë euro. Fitimi gjatë kësaj periudhe ra me 69% nga viti në vit në 133 milionë euro.

Një nga prodhuesit më të mëdhenj në botë të pajisjeve të telekomunikacionit, Nokia është përballur me situata jo pozitive për shkak të ngadalësimit të ekonomisë globale por dhe nga reduktimet e shpenzimeve të infrastrukturës të bëra nga operatorët celularë.

Shitjet nga njësia më e madhe e Nokia-s sipas të ardhurave, biznesi i saj i rrjeteve celulare, ranë 24% në bazë vjetore në 2.16 miliardë euro, me fitimin operativ për divizionin që u tkurr 64%.

Nokia tha se kjo ishte shkaktuar kryesisht nga rënia e shitjeve në Amerikën e Veriut. Kompania gjithashtu i përshkroi vëllimet e shitjeve në Indi si të moderuara.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.