Të plakemi në Holandë! – Vendi me sistemin më të mirë të pensioneve në botë

Holanda regjistroi sistemin më të mirë të pensioneve në botë në vitin 2023, sipas hulumtimit të kompanisë amerikane Mercer.

Vlera e Indeksit Global të Pensioneve të Holandës është 85 pikë, pas saj është fituesja e vitit të kaluar Islanda me 83.5 pikë, ndërsa vendin e tretë e ka zënë Danimarka me 81.3 pikë, sipas faqes së internetit të organizatës.

Sistemet e pensioneve vlerësohen bazuar në përshtatshmërinë, qëndrueshmërinë dhe integritetin e tyre dhe raporti thekson se pensionet në mbarë botën janë nën presion të paprecedentë. Mercer analizoi sistemet e pensioneve të 47 vendeve dhe Argjentina zuri vendin e fundit. SHBA-të janë në vendin e 22-të dhe Kina në vendin e 30-të.

Rënia e nivelit të lindjeve ka ushtruar presion në disa ekonomi dhe sisteme pensionesh në terma afatgjatë, thuhet në raport, duke ndikuar negativisht në rezultatet e qëndrueshmërisë për vende të tilla si Italia dhe Spanja.

Inteligjenca artificiale  ka potencialin për të përmirësuar sistemet e pensioneve duke çuar në një vendimmarrje më efikase dhe më të mirëinformuar, dhe potencialisht në kthime reale të investimeve më të larta, sipas autorëve që kanë hartuar këtë raport.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.