OKB, më shumë fuqi në rregullat globale të taksave – SHBA, BE dhe Britania “kundër” vendeve afrikane

Një fushatë e gjatë që Kombet e Bashkuara të kenë ndikim më të madh mbi rregullat ndërkombëtare të taksave pritet të dështojë në pengesën e fundit në një votim në Nju Jork, me Brukselin dhe Mbretërinë e Bashkuar që zotohen bllokojnë masën.

Aktivistët kundër varfërisë thanë se OKB-ja duhet të ketë një “zë” më të fuqishëm për sa i përket taksimit të korporatave shumëkombëshe për të parandaluar situatën e cila u mohon vendeve të varfra të ardhura jetike për të trajtuar varfërinë dhe për të përballuar krizën klimatike.

Një votim për të çuar përpara një konventë të OKB-së për të forcuar bashkëpunimin ndërkombëtar tatimor, i paraqitur nga grupi i Afrikës në asamblenë e përgjithshme të OKB-së, do të kishte nevojë për një marrëveshje të gjerë, duke përfshirë SHBA-në dhe vendet e pasura në Europë. BE dhe Mbretëria e Bashkuar janë akuzuar për bllokimin e procesit gjatë negociatave intensive muajin e kaluar.

Londra, Brukseli dhe Uashingtoni pritet të votojnë kundër masës, duke përmendur marrëveshjet ekzistuese për të vendosur rregullat ndërkombëtare të taksave nga Organizata për Bashkëpunim Ekonomik dhe Zhvillim – OECD.

Organizata me bazë në Paris, e cila numëron 39 vende kryesisht të pasura midis anëtarëve të saj, ka shpenzuar dekada duke formuluar rregulla të sofistikuara dhe marrëveshje të përbashkëta që rregullojnë mënyrën se si korporatat shumëkombëshe paguajnë taksat.

Por, këto përpjekje kanë tërhequr kritika nga zyrtarët në disa ekonomi në zhvillim, të cilët besojnë se korporatat e mëdha kanë arritur të shmangin detyrimet e tyre, kryesisht duke vazhduar të përdorin juridiksione me taksa të ulëta. Vitin e kaluar, një grup prej 54 vendeve afrikane, të frustruar nga procesi i OECD, paraqitën një rezolutë në asamblenë e përgjithshme të OKB-së.

I vendosur për të anashkaluar OECD-në, grupi rekomandoi që sekretari i përgjithshëm i OKB-së, António Guterres, të përgatiste një raport që vlerësonte mënyrat për të forcuar “përfshirjen dhe efektivitetin” e bashkëpunimit ndërkombëtar tatimor, duke përfshirë opsionet që i dhanë OKB-së më shumë një rol në skenën globale të taksave.

Përpara votimit, një raport i OECD-së argumentoi se shumica e shmangies së taksave nga bizneset shumëkombëshe u krye në vendet e pasura, pasi u kërkoi anëtarëve të saj të bënin më shumë përparim në ratifikimin e marrëveshjeve që tashmë kishin mbështetje të gjerë. Ai tha se rreth 37.1% e fitimeve neto globale që arrijnë në 6.5 trilionë dollarë u tatuan me norma nën 15%, kryesisht në vendet që kishin norma tatimore shumë më të larta.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.