OSHEE: Kursyem miliona euro nga humbjet në rrjet – Kompania pranon shpenzimet e larta, 2022 u mbyll me 19.7%. Gati 1% më pak, se vjet

Humbjet e energjisë në rrjetin e shpërndarjes u reduktuan me gati 1% gjatë vitit 2022. Të dhënat bëhen me dije nga Operatori i Shpërndarjes së Energjisë Elektrike, sipas të cilit viti që lamë pas u mbyll me një nivel humbjesh prej 19.7% nga 20.62% që ky tregues ishte në vitin 2021. Reduktimi duket se ka ardhur si pasojëe humbjeve joteknike, ku futen vjedhjet e energjisë.

Kjo pasi, sipas OSHEE-së u arrit rritja e faturimit dhe ulja e abuzimeve, pavarësisht vështirësive, importeve, çmimeve apo mungesës së investimeve.  “Janë rreth 100 mijë Mwh energji elektrike të rikuperuara në 2022 me efekt pozitiv disa milionë euro, ku në kushtet e krizës globale të çmimeve marin vlerë të shtuar”, – bën me dije OSHEE. Ndarja midis humbjeve teknike, që vijnë si pasojë e trrjetit të amortizuar dhe atyre joteknike nuk është bërë publike nga ky dikaster. Ndërkohë që sipas të dhënave të fundit të disponueshme, që i përkasin 8-mujorit 2022, sasia më e madhe e humbjeve vjen si pasojë e rrejtit, me rreth 70% të totalit, ndërkohë që pjesa tjetër prej 30% shkaktohet nga lidhjet e paligjshme.

Kjo nënkupton se shpenzimet për mbulimin e tyre për financat e kompanive publike janë të larta, duke marrë në konsderatë edhe çmimet e kripura në tregun e parregulluar. Objektivët e vendosur nga qeveria për reduktimin e humbjeve, parashikojnë një reduktim gradual të lehtë përgjatë viteve të ardhshëm. Sipas planit të rishikuar në vitin 2023 duhet të mbyllet me 19%, ndërsa në vitet në vijim do të duhet të jetë me më pak se 1% në vit, duke arritur në 17.8% në vitin 2026. Ky plan u miratua pas mos arritjes së objektivit në vitin 2019, ku synohej që humbjet të ishin në 14%.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.