Ndryshimet klimatike ushtrojnë presion ndaj bizneseve – Sondazhet, një nga tre çështjet më urgjente në sektor

Ndryshimet klimatike janë prioriteti më i rëndësishëm për biznesin mes pasigurisë globale. Ky është rezultati i një sondazhi të kryer nga Deloitte midis më shumë se 2000 drejtuesve të biznesit në 24 vende me temën “Qëndrueshmëria dhe përshpejtimi i tranzicionit të gjelbër”. Kur u pyetën për të renditur çështjet që i shtyjnë më shumë kompanitë e tyre, shumë drejtues e quajtën ndryshimin e klimës si një nga “tre çështjet më të ngutshme”, duke u renditur më lart se shtatë të tjerat, të cilat përfshijnë inovacionin, konkurrencën për talentin, por edhe sfidat e zinxhirit të furnizimit. Vetëm perspektiva ekonomike renditet pak më e lartë se ndryshimi i klimës. Për më tepër, 75% e të anketuarve thanë se bizneset e tyre kishin rritur investimet e tyre në qëndrueshmëri vitin e kaluar, me rreth 20% që thanë se i kishin rritur dukshëm.

Në raportin përkatës, janë formuluar propozime indikative që mund të ndihmojnë bizneset të kapërcejnë hendekun midis pritshmërive nga tranzicioni i gjelbër dhe ndikimit real nga i gjithë ky proces. Qëllimi i këtyre propozimeve është përshpejtimi i rrugës drejt një ekonomie më të ulët të karbonit. Interesi gjithnjë në rritje i drejtuesve për qëndrueshmërinë gjatë vitit të kaluar tregon se ndikimet e ndryshimeve klimatike janë tashmë pjesë e axhendës së biznesit.

Pothuajse të gjithë të anketuarit vunë re se biznesi i tyre është ndikuar nga ndryshimet klimatike vitin e fundit. 46% përmendën mungesën e burimeve ose kostot e larta si problemin më serioz që prek tashmë bizneset e tyre, ndërsa 45% e të anketuarve theksuan ndryshimin e modeleve të konsumit ose preferencave që lidhen me ndryshimin e klimës. Së fundi, 43% përmendën rregullimin e emetimeve të gazrave si një tjetër çështje shumë të rëndësishme që prek bizneset e tyre. Gjithashtu, rreth 1/3 e drejtuesve thanë se ndryshimet klimatike ndikojnë negativisht në shëndetin fizik dhe mendor të punonjësve. Përveç ndikimit te bizneset dhe palët e tyre të interesit, 82% e drejtuesve raportuan se ishin prekur personalisht nga efektet e ndryshimeve klimatike vitin e kaluar, me nxehtësinë ekstreme që ishte problemi më i zakonshëm.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.