Pajisjet ngrohëse kineze “zbulojnë” Europën – Gjatë këtij viti, eksportet në Kontinentin e Vjetër nga kompanitë në Cixi City u rritën 55%

Kompanitë në Cixi City, Provinca Zhejiang e Kinës Lindore, po regjistrojnë rritje të porosive në eksportet e ngrohësve portativë dhe pajisjeve të tjera të ngrohjes për klientët europianë, të cilët pritet të përballen me një sezon të ashpër dimri me furnizim të kufizuar të gazit natyror dhe kosto të larta të energjisë.

Tetori dikur shënonte fillimin e sezonit për prodhimin e ngrohësve, por këtë vit, linjat e montimit të produkteve të ndryshme termike kanë nisur më përpara punën, pasi të gjitha llojet e pajisjeve të ngrohjes dhe batanijet elektrike janë të tejet të kërkuara nga klientët europianë.

E konsideruar si “baza e prodhimit” për produktet termike, vlera e eksportit e produkteve termike në këtë qytet në tetë muajt e parë të këtij viti arriti në rreth 470 milionë dollarë, mbi 26% më shumë krahasuar me vitin 2021. Produktet që shkuan në Europë kapin vlerën rreth 210 milionë dollarë, një rritje vjetore mbi 55%.

Kompania Yulong Electric Appliance ka shitur produkte ngrohje për më shumë se 10 vjet dhe regjistroi një rritje të shitjeve prej mbi 30% gjatë nëntë muajve të fundit.

“Europa zë rreth 60% të tregut tonë. Produktet më të njohura janë me kosto efektive, me çmime të ulëta dhe të mesme. Kemi rreth 200 lloje ngrohësesh, por vendet europiane dhe amerikane preferojnë ngrohës të lëvizshëm”, deklaroi menaxheri i përgjithshëm i kompanisë.

“Cixi ka rreth 100 kompani të eksportit të pajisjeve ngrohëse. Që nga gjysma e dytë e këtij viti, ngrohësit elektrikë janë renditur si produkti i dytë më i madh i eksportit në qytet. Ngrohësit do të ruajnë rritjen e shpejtë deri në fund të vitit, para Krishtlindjeve”, theksoi një nga zyrtarët.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.