Panelet diellore i ka instaluar vetëm 0.09% e abonentëve – OSHEE ka mbi 1.1 mln klientë, energjia vetëprodhohet nga 1 025 prej tyre

Pavarësisht tendencës në rritje, numri i abonentëve që kanë instaluar panele fotovoltaike për të vetëprodhuar energji elektrike është tejet i ulët. Sipas të dhënave të përpunuara nga TV SCAN rezulton se vetëm 0.09% e klientëve që kanë një kontratë me Operatoritn e Shpërndarjs së Energjisë Elektrike kanë zgjedhur panelet diellore për të gjeneruar vetë energjinë e nevojshme.

Kjo pasi, sipas të dhënave të bëra publike nga OSHEE një muaj më parë, në total janë 1025 abonentë kanë instaluar panele fotovoltaike, me qëllim vetëprodhimin e energjisë elektrike.

Ndërkohë që, numri i abonentëve të Operatorit të Shpërndarjes së Energjisë Elektrike është mbi 1.1 mln. Interesi për të instaluar panele diellore u rrit ndjeshëm vitin e kaluar, kryesisht nga bizneset që përballën me rritjen e çmimit të energjisë në masën 70%.

Ndërkohë që, sipas kompanive që operojnë në treg interesi nuk mungoi as nga familjarët, për shkak të deklaratave të qeverisë për rikthimin e tarifimit me 2 fasha. Megjithatë, sipas ekspertëve numri i atyre impianteve që kanë arritur të lidhen me rrjetin është tejet modest e do të duhet stimuj të mëtejshëm për të rritur këtë tregues. Deri më tani pengesa kryesore është konsideruar skema e matjes mujore, që ndikon ndjeshëm në reduktimin e përfitimeve që vijnë nga instalimi i paneleve.

Ndërkaq, pak ditë më parë u miratua ligji, që parashikon bilancin vjetor, teksa pritet botimi në Fletore Zyrtare për hyrjen në fuqi të tij. Sipas të dhënave nga OSHEE, fuqia totale e impianteve të instaluar deri në mani arrin në 102 MË, ndërkohë që 59% pjesa e tyre është pozicionuar në Tiranë dhe Durrës.

Ola Mitre /SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.