Peleshi: Përmirësohet situata nga përmbytjet – PD i kërkon kryeministrit shpalljen e gjendjes së fatkeqësisë natyrore në 3 qarqe

Gjatë orëve të fundit është regjistruar një përmirësim i konsiderueshëm i situatës nga reshjet intensive që përfshinë vendin duke nisur nga data 20 Nëntor. Deklarata është bërë nga Niko Peleshi, ministër i mbrojtjes dhe njëkohësisht Kryetar i Komitetit të Mbrojtjes Civile. Ai u shpreh se sipas të dhënave të fundit nga Qendra Kombëtare Operacionale e Emergjencave Civile, reshjet e shiut kanë vazhduar me intensitet të ulët gjatë natës dhe të lokalizuara.

Sipas tij: Ka rënë ndjeshëm sipërfaqja e tokës e mbuluar nga uji në qarkun e Shkodrës. Sot janë 1685 hektarë tokë nën ujë dhe vazhdon tërheqja, nga 4346 ha që ishte dje në darkë Aktualisht janë vetëm 26 familje me 99 anëtarë të evakuuar, nga 52 familje dhe rreth 318 banorë që ishin dje. Të tjerët janë kthyer në banesat e tyre.

Në Bashkinë e Lezhës ka pasur gjithashtu përmirësim:

–         Ka prani uji vetëm në 4 banesa nga 24 që ishin dje

–         1300 hektarë sipërfaqe e përmbytur

Peleshi u shpreh se edhe rrugët kombëtare dhe ato turistike janë të kalueshme, veç pak segmenteve, ku po punohet. Ai rikujtoi se të gjitha bashkitë kanë patur dhe kanë në dispozicion fondin e emergjencave prej 10 mln euro, i ndarë në proporcion me buxhetet e bashkive. Ky fond është parashikuar edhe në buxhetin e vitit të ardhshëm.

Ndërkohë, opozita kërkon shpalljen e gjendjes së fatkeqësisë natyrore në 3 qarqet e prekura nga përmbytjet.

“Duke parë zhvillimet e këtyre ditëve një pjesë e deputetëve tanë të PD-së, kanë iniciuar një kërkesë drejtuar kryeministrit me të cilën kërkohet shpallja e gjendjes së fatkeqësisë natyrore në këto 3 qarqe. Situata e 3 ditëve të fundit ka shkaktuar problematika në 3 qarqet, Shkodër, Durrës dhe Lezhë. Ka dëmtuar të mbjella, pasuri natyrore por dhe humbje të jetëve. Nisur nga kjo kemi kërkuar me anë të kësaj kërkesë, për tu përmbushur kriteret ligjore për shpalljen e emergjencës. Kjo është një kërkesë juridike jo politike. Kërkesa jonë i drejtohet kryeministrit për shpalljen e gjendjes së jashtëzakonshme, është një kërkesë e bazuar në kushtetutë, legjislacion për një arsye të thjeshtë”.

Sipas Alibeaj, duhet të kalohet nga një situatë e debatit politik te një nivel i situatës ligjore.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.