“Pensionet e ulëta, jo më pak se 20 mijë lekë” – Eksperti argumenton ndërhyrjet në skemën e pensioneve, paqartësi me vitet e punës

Jo indeksim i unifikuar për pensionet, sikundër ka ndodhur në këto 10 vite, por një rritje e diferencuar bazuar në masën e përfitimit. Është ky një prej varianteve që Instituti i Sigurimeve Shoqërore është duke marrë në konsideratë, nga procesi i vlerësimit që ka nisur në bashkëpunim me Bankën Botërore.

Kjo do të thotë, që për pensionet minimale, shtesa do të jetë më e lartë në raport me pjesën tjetër. Ekspertët janë të mendimit, që të mos ketë asnjë pension nën kufirin e minimumit jetik, që vlerësohet të jetë rreth 20 mijë lekë.

Nga studio e emisionit “Box to Box” Ramadan Kondi, ekspert fiskal u ndal edhe tek përllogaritja e pensionit dhe vështirësitë që hasin qytetarët duke qenë se nuk kanë informacion të plotë për vitet e punës.

Kujtojmë që, formula aktuale përcakton një pension bazë dhe shtesën. Pensioni bazë është më pak se 10 mijë lekë, ndërsa shtesa bazuar në formulën e llogaritjes së pensionit, është 1 për qind për çdo vit sigurimi, shumëzuar me bazën mesatare të vlerësueshme, që personat e siguruar kanë arritur nëpërmjet kontributeve të paguara.

Ada Hazizolli/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.