Përcaktohet ‘fati’ i Avokatit të Popullit – 20 kandidatë në garë, Majko: Do zgjidhet nga kandidaturat e propozuara opozita

Ndërsa gara për avokatin e Popullit ka përfshirë në garë 20 emra, ku nuk mungojnë ata me profil të lartë politik, mazhoranca ka bërë me dije se ka vendosur t’i lërë opozitës zgjedhjen e emrit që do pasojë Erinda Ballancën në këtë post. Vendimi është publik nga deputeti i PS Pandeli Majko

Mazhoranca ka vendosur t’i lërë opozitës përzgjedhjen e emrit që do të zëvendësojë Erinda ballancën në krye të institucionit të Avokatit të Popullit. Vendimi është bërë publik nga deputeti i Partisë Socialiste Pandeli Majko gjatë votimit të projektrezolutës për institucionin e Avokatit të Popullit për vitin 2022.

Gara për zgjedhjen e Avokatit të Popullit zgjatet prej muajsh, në një kohë që si rrallë më parë, posti ka ngjallur shumë interes këtë vit. Në garë janë aktualisht 20 emra, mes të cilëve politikanë e ish-Ministra si Ilir Rusmaili, apo ish deputeti i partisë Demokratike Sali Shehu, por edhe ish Drejtori i Policisë Ahmet Prençi apo Bledar Dervishajt, Këshilltar i Presidentit Ilir Meta.

Për t’u përmendur është edhe rikandidimi i Erinda Balancës, e cila kërkon një mandate të dytë në krye të këtij institucioni, ndërkohë që në garë është futur edhe Lefterije Luzi, ish Kryetare e Komisionit Qendror të Zgjedhjeve. Pjesa tjetër e listës përbëhet më së shumti nga jurist të rangjeve të larta, si Jordan Daci, Ledio Braho, apo Avokati Altin Goxhaj, Endri Papajorgji.

Lorenc Rabeta / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.