Policia ngre qendrën “AMAIS” për identifikimin biometrik – 1.8 milionë euro për laboratorin me 100 mijë imazhe, shenja gishtash dhe zë

Policia e Shtetit po bëhet gati të krijojë një qendër të avancuar teknologjike për identifikimin biometrik të personave. Për këtë qëllim është hapur një tender me fond limit rreth 224 milionë lekë ose rreth 1.8 milionë euro. Projekti do të përmirësojë dhe do të rrisë shpejtësinë e përpunimit të informacionit nga Policia Shtetit, si dhe do të shërbejë për standardizimin e procedurave ligjore për identifikimin biometrik të personave që janë të përfshirë në aktivitet kriminal dhe janë shpallur në kërkim nga Policia e Shtetit. Ky identifikim biometrik do të realizohet me anën e imazheve të fytyrës, gjurmëve të gishtave dhe zërit human.

Qendra AMAIS do të nisë si projekt pilot me kapacitet deri në 100 mijë imazhe të fotografive të fytyrave njerëzore. Si bazë të dhënash do të përdoren imazhet e fytyrave të personave që Drejtoria Qendrore e Hetimit të Policisë Kriminale ka të ruajtura në sistemin e saj, duke bërë të mundur hedhjen dhe ruajtjen e tyre në serverët e qendrës AMAIS dhe më pas duke bërë krahasimin e imazheve digjitale të personave që janë fiksuar në veprimtari të ndryshme kriminale.

Po ashtu, në bazë të të dhënave do të hidhen edhe shenjat e gishtërinjve që janë regjistruar pranë Institutit të Policisë Shkencore si dhe të dhënat zanore të përgjimeve të ndryshme që janë kryer.

Në këtë mënyrë, synohet që të krijohet një databaza funksionale që do të shërbejë për identifikimin e shpejtë të personave të përfshirë në ngjarje të ndryshme kriminale.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.