Portugalia vendos rekord të ri ‘të rëndësishëm’ për energjinë e rinovueshme pasi prodhimi tejkalon kërkesën!

Nga 31 tetori deri më 6 nëntor, prodhimi i energjisë së rinovueshme tejkaloi nevojat e vendit për energji elektrike për 149 orë rresht, duke vendosur një rekord të ri. Gjatë gjashtë ditëve radhazi, janë prodhuar 1102 GWh energji elektrike krahasuar me 840 GWh që ka konsumuar vendi gjatë së njëjtës periudhë. Prodhimi i tejkaloi nevojat për energji të familjeve dhe industrisë me 262 GWh.

Rekordi i mëparshëm, i vendosur në vitin 2019, ishte 131 orë ku oferta tejkaloi kërkesën. Gjatë kësaj periudhe janë shënuar edhe dy rekorde të tjera. Për 131 orë nga 31 tetori 2023, energjia e rinovueshme ka tejkaluar nevojat e të gjithë Sistemit Elektrik Kombëtar përfshirë kërkesat për pompimin në rezervuarët hidroelektrikë. Kjo arritje u realizua pa përdorur burime konvencionale të gjenerimit të energjisë termike, si impiantet me cikël të kombinuar të gazit natyror.

Dhe midis 1 nëntorit dhe 5 nëntorit, pati 95 orë radhazi në të cilat prodhimi i burimeve të rinovueshme ishte më i madh se konsumi, pa pasur nevojë për impiante me cikël të kombinuar të gazit natyror dhe Portugalia ishte në gjendje të eksportonte energji elektrike në Spanjë.

Portugalia synon të prodhojë 85 % të energjisë elektrike të saj nga burime të rinovueshme deri në vitin 2030. Ajo shpreson të çaktivizojë të gjitha termocentralet e saj me gaz natyror deri në vitin 2040 dhe të bëhet neutral ndaj karbonit deri në vitin 2045 – pesë vjet më herët se angazhimi i saj fillestar.

Sipas REN, në tetor, energjia e rinovueshme gjeneroi 67 % të nevojave të vendit për energji, kryesisht për shkak të kushteve të favorshme për energjinë hidrike dhe të erës. Vetëm era pati një maksimum historik muajin e kaluar në Portugali, duke thyer një rekord për sa energji prodhoi në një ditë.

Që nga fillimi i vitit, burimet e rinovueshme kanë përmbushur 56 % të kërkesave të vendit për energji. Era përbënte 24 % të kësaj, hidroenergjia 18 %, energjia diellore 8 % dhe biomasa 6 %. Gazi natyror (ose fosil) prodhonte 21 % të energjisë së Portugalisë dhe 23 % e mbetur importohej nga vende të tjera.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.