Prodhimi industrial gjerman vazhdon të rritet – Më shumë shpresë për daljen e vendit nga recesioni

Prodhimi industrial gjerman vazhdon të shënojë rritje. Një fenomen ky që përsëritet për të dytin muaj rradhazi duke i dhënë vendit më shumë shpresë për daljen nga recesioni. Por pavarësisht rritjes së regjistruar këtë muaj, prodhimi i përgjithshëm është ende shumë nën nivelet para pandemisë

 Prodhimi industrial gjerman u rrit për të dytin muaj radhazi, duke rritur shpresat se ekonomia më e madhe e Europës mund të dalë së shpejti nga recesioni në të cilin ka gjasa të ketë qenë gjatë gjashtë muajve të fundit. Indeksi i prodhimit industrial tregoi një rritje prej 2.1% në muajin shkurt, i nxitur nga ndërtimi. Kjo normë ishte më e lartë se vlerësimet e ekonomistëve në një sondazh të Bloomberg.

Pavarësisht rritjes së regjistruar këtë muaj, prodhimi i përgjithshëm është ende shumë nën nivelet para pandemisë, duke theksuar sfidat me të cilat përballet sektori prodhues i Gjermanisë – përfshirë rritjen e kostove të energjisë pas luftës në Ukrainë.

Gjithashtu, si faktorë rëndues kanë qenë kërkesa e dobët e jashtme, kostot e larta të huamarrjes dhe pasiguria në drejtimin e politikës ekonomike. Të dhënat industriale gjermane sinjalizojnë një fund të stagnimit në tremujorin e parë. Sipas ekspertëve më në fund ka një optimizëm të zbutur se të paktën recesioni ciklik ka marrë fund.

Provat kohët e fundit kanë qenë të paqarta. Vetëm pak ditë më parë u raportua se porositë e fabrikës treguan një rritje të vogël, por vetëm për shkak të çmimeve të paqëndrueshme të industrisë së rëndë. Ndërkohë, sondazhet e biznesit nga S&P Global treguan një përkeqësim të momentit të industrisë në mars.

Besimi i biznesit, i matur nga instituti Ifo dhe pritshmëritë e investitorëve ZEË u përmirësuan muajin e kaluar, të rritur nga perspektiva e një uljeje të normës së interesit nga Banka Qendrore Europiane, e cila ka të ngjarë të fillojë në qershor, dhe nga përmirësimi i kushteve globale.

Ekonomistët e anketuar nga Bloomberg prisnin që ekonomia gjermane të tkurret me 0.1% në tremujorin e parë, pas një tkurrjeje prej 0.3% në tre muajt e fundit të vitit të kaluar. Një model i ri i Bloomberg Economics tregon një rezultat më të butë, duke e vendosur mundësinë e një recesioni në pak më shumë se 30%.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.