Protestat në Kinë mbështesin dollarin – Investitorët i frikësohen mosbindjes civile kundër masave të Covid-19

Dollari amerikan po qëndron në rritje në sesionin e sotëm, për shkak se protestat kundër Covid-19 në Kinë kanë rrëzuar tregjet financiare, duke bërë që investitorët të preferojnë asetet e sigurta, ku bën pjesë edhe monedha e gjelbër. Protestat kundër masave të Covid-19 janë përhapur në të gjithë Kinën, ndërsa në Shanghai protestuesit janë përplasur me policinë.

Shqetësimet për një valë të paprecedentë të mosbindjes civile, në një vend ku protestat janë shumë të rralla, dhe mënyra se si do të përgjigjet Pekini zyrtar, kanë bërë që investitorët të tregohen të kujdesshëm. Në përpjekje për të mbështetur ekonominë, përballë rritjes së infektimeve me Covid-19, autoritetet kanë marrë disa masa. Banka Popullore e Kinës, deklaroi se, për të rritur kreditimin do të ulë me 25 pikë bazë rezervën e detyrueshme për bankat, rregull që do të bëhet efektiv duke filluar nga 5 dhjetori.

Në këtë situatë, euro ka humbur rreth 0.4% të vlerës përballë dollarit amerikan dhe po tregtohet në rreth 1.035 dollarë, ndërsa paundi po tregtohet në rreth 1.2 dollarë. Investitorët po presin edhe fjalimin që do të mbajë shefi i Rezervës Federale, Jerome Powell, i cili do të flasë për ekonominë dhe tregun e punës. Në tregun e kriptomonedhave, bitcoin po tregtohet në rreth 16,200 dollarë, ndërsa ethereum po tregtohet në rreth 1170 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.