Punësimi në SHBA rrëzon dollarin – Hapja e vendeve të reja të punës bie për të tretin muaj radhazi

Dollari i është rikthyer humbjeve në sesionin e sotëm, pasi të dhënat e publikuara në SHBA treguan se hapja e vendeve të reja të punës ra gjatë muajit mars. Këto të dhëna vijnë përpara se Rezerva Federale të zhvillojë takimin periodik. Ku me shumë mundësi do të rrisë normën bazë të interesit me 25 pikë bazë. Hapja e vendeve të reja të punës në SHBA ra për të tretin muaj me radhë, ndërsa largimet nga puna prekën nivelin më të lartë në 2 vitet e fundit.

Në anën tjetër, një raport i Departamentit të Tregtisë tregoi se porositë në fabrika u rritën me 0.9%, kundrejt parashikimeve për një rritje me 1.1%. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 101.9, nga rreth 102.4 që ishte në sesionin e kaluar.

Ndërkohë, euro është ngjitur në mbi 1.1 dollarë, duke ju afruar më shumë nivelit më të lartë në 1 vit që regjistroi javën e kaluar. Përveç takimit të Rezervës Federale ditën e sotme, investitorët po presin edhe takimin e Bankës Qendrore Europiane të enjten dhe pritshmëritë janë për një rritje të normës bazë të interesit me 50 pikë bazë. Në tregun e kriptomonedhave, bitcoin po tregtohet në rreth 28,600 dollarë, ndërsa ethereum po tregtohet në rreth 1870 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.