Nafta, në nivelin më të ulët në 5 javë – Ngadalësimi i ekonomisë rrëzon çmimet me mbi 5% në sesionin e kaluar

Nafta po qëndron në rënie edhe në sesionin e sotëm, ndërsa një ditë më parë humbi rreth 5% të vlerës, duke zbritur në nivelin më të ulët në 5 javët e fundit. Investitorët shqetësohen se, rritja e interesave nga bankat qendrore do të dëmtojë akoma më shumë kërkesën për naftë.

Nafta Brent e Londrës po tregtohet në rreth 75 dollarë për fuçi, ndërsa nafta Bruto amerikane po tregtohet në rreth 71 dollarë për fuçi. Në dyja kontratat e mbyllën sesionin e kaluar në nivelin më të ulët që nga 24 marsi i këtij viti, ndërsa realizuan humbjet më të mëdha ditore që nga fillimi i janarit. Rezerva Federale në Shtetet e Bashkuara parashikohet të rrisë normat e interesit edhe me 25 pikë bazë, në takimin që përfundon ditën e sotme.

Në anën tjetër, Banka Qendrore Europiane do të mblidhet të enjten dhe parashikohet një rritje e normës bazë të interesit me 50 pikë bazë. Shtrëngimi i politikave monetare nga bankat qendrore pritet të ngadalësojë ekonominë, dhe për rrjedhojë edhe kërkesën për energji. Edhe të dhënat e publikuara në Kinë treguan një ngadalësim të aktivitetit të manifakturës, gjatë prillit.

Investitorët po presin edhe të dhënat zyrtare mbi rezervat e naftës në SHBA, që publikohen gjatë ditës së sotme, nga Administrata për Informimin mbi Energjinë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.