Qeveria, bursë me kusht studentëve – Për ta përfituar, pas diplomimit duhet të punojnë të paktën 3 vite në Shqipëri

Studentët që kërkojnë të marrin një bursë shtetërore duhet që pas përfundimit të studimeve të punojnë të paktën tre vite në Shqipëri. Në vendimin e fundit të qeverisë është shpallur një listë e programeve prioritare siç janë bujqësia, disa inxhinieri, turizmi, mësuesia. Sipas ministres së Arsimit, Evis Kushi, të gjithë ata maturantë që kanë mesataren mbi 8.5 dhe që zgjedhin një nga këto programe prioritare përfitojnë një bursë sa paga minimale, çdo muaj.

Detyrimi i tyre është që pas diplomimit të qëndrojnë 3 vite, të japin kontribut për vendin. Dhe të njëjtën bursë sa paga minimale çdo muaj e përfitojnë edhe studentët ekselentë që janë me të gjitha dhjeta në maturë dhe të katërta provimet e maturës, ashtu sikurse ata që fitojnë olimpiada ndërkombëtare.

Për ne nuk është thjesht qëllimi që të zgjedhë këtë program që është prioritar, por ta mbështesim përgjatë gjithë periudhës së studimeve që në fund fare të finalizohet me diplomim, dhe në fund të fundit t’i shërbejë vendit edhe për karrierën e tyre dhe të ardhmen e tyre, por edhe për të plotësuar nevojat që ka vendi.

Sipas ministres, me vendimin e sotëm buxheti, do të ndahet me kuota për çdo universitet dhe pastaj janë vetë universitetet nëpërmjet senateve të tyre akademike që numrin total të kuotave që kanë për bursa e ndajnë në programe të ndryshme që janë prioritare sipas nevojave të tyre specifike apo zhvillimeve specifike që kanë zonat ku janë këto universitete.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.