Rritja e sigurisë në rrugë – ARRSH, 45.3 mln lekë tenderë për eleminimin e pikave të zeza
45.3 mln lekë është vlera e tre procedurave të prokurimit publik, që pritet të hapen nga Autoriteti Rrugor Shqiptar për eleminimin e pikave të zeza në rrugë. Ende nuk dihet se cilat janë vendet e evidentuar si burim aksidenti, ndërkohë që tenderët parashikohet të hapen në muajt në vijim. Kjo nuk është hera e parë, që ARRSH zhvillon një tender për rritjen e sigurisë në rrugë, duke patur në fokus ato pjesë të rrjetit rrugor kombëtar, që paraqesin rrezikshmëri më të lartë.
Kështu, në janar të këtij viti u shpall fitues konsorciumi i 3 kompanive, që do të ndërhyjë në 21 pika, që ndodhen në segmente të ndryshme rrugore. Vendet ku do të ndërhyhej përmes kontratës me vlerë 58.1 mn lekë ndodheshin në Velipojë, në segmentet Fier – Levan, Plepa – Rrogozhinë, Cerrik – Banjë, etj.
Pavarësisht, tendencës në rënie numri i të aksidentuarve në rrugë mbetet i lartë. Sipas të dhënave nga Instituti i Statistikave, për periudhën janar – maj të këtij viti numri i tyre ka arritur në 590. Ndërkohë që, në të njëjtën periudhë të vitit 2022 numri i personave të aksidentuar në rrugë arriti në 680. Sipas INSTAT, në pesëmujorin e parë të vitit 2023, u regjistruan 427 aksidente rrugore, apo 11.6% më pak se aksidentet e ndodhur në të njëjtën periudhë të një viti më parë.
Ola Mitre/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.