Qeveria spanjolle përforcon taksën bankare – Ekzekutivi i ri ka në objektiv edhe kompanitë e mëdha

Liderja e platformës së majtë spanjolle ‘Sumar’, Yolanda Diaz, konfirmoi se një marrëveshje e mundshme për një qeveri koalicioni me Partinë Socialiste parashikonte zgjerimin dhe forcimin e një takse të jashtëzakonshme për bankat dhe kompanitë e mëdha të energjisë. Por ky koalicion ende nuk ka fituar mbështetjen e partive të tjera në parlament.

Diaz tha gjithashtu se partnerët kishin rënë dakord që të gjitha kompanitë do të taksoheshin me një normë efektive prej 15% mbi fitimin e tyre kontabël, në vend të fitimit bazë. Kompanitë aktualisht paguajnë midis 23% dhe 25% mbi fitimin bazë.

Marrëveshja, që erdhi pasi kryeministri në detyrë Pedro Sanchez u takua me lideren e Sumar dhe ministre në detyrë të Punës, Yolanda Diaz, përfshin gjithashtu një propozim për të reduktuar orët e punës duke ruajtur të njëjtën pagë.

Investitorët kanë pritur që nga zgjedhjet e muajit korrik për të parë nëse do të kishte ndonjë marrëveshje për një zgjatje të një takse dyvjeçare, 4.8% të miratuar në dhjetor mbi të ardhurat neto nga interesi të bankave dhe komisionet neto mbi 800 milionë euro.

Për kompanitë energjetike me një xhiro prej të paktën 1 miliard euro, pa përfshirë biznesin e rregulluar vendas dhe operacionet e jashtme, norma është 1.2%.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.