Reduktimi i emetimeve të CO2: Si po ecën SHBA-ja në krahasim me Europën?

Lajm i mirë për klimën! Disa vende të zhvilluara kanë raportuar kohët e fundit një rënie rekord në emetimet e tyre të gazeve serrë (GHGs) në vitin 2023. Ministria Franceze e Tranzicionit Ekologjik njoftoi një rënie prej 4.8% në 2023 krahasuar me një vit më parë, me 384.5 milion ton ekuivalent CO2 të emetuar në Francë. Në vitin 2022, ulja ishte 2.7% krahasuar me vitin 2021.

“Është një vit rekord”, tha ministri, Christophe Béchu sipas stacionit televiziv francez TF1, duke shtuar se reduktimi në një vit të vetëm ishte pothuajse i barabartë me atë të të gjithë periudhës 2012-2017. Për Christophe Béchu, të gjithë sektorët e aktivitetit kontribuan në performancën e vitit të kaluar, “veçanërisht ndërtimi dhe industria”, me përjashtim të transportit dhe veçanërisht transportit ajror, emetimet e të cilit u rritën në vitin 2023.

Prodhimi francez i energjisë ka parë një rënie të ndjeshme të emetimeve të CO2 (-14%), sipas botimit francez Les Échos, falë rikomisionimit të flotës bërthamore, e cila ka bërë të mundur rritjen e prodhimit të energjisë pa karbon. Megjithatë, kjo trajektore mbetet e pamjaftueshme për të arritur objektivin e një reduktimi prej 34% midis 2022 dhe 2030, siç thekson Economic Daily. Qëllimi përfundimtar është neutraliteti i karbonit në vitin 2050, ose 55% më pak emetime neto të CO2.

Në anën tjetër të Rhein, emetimet e CO2 ranë me 10.1% në 2023 krahasuar me 2022, në rreth 674 milion ton ekuivalent CO2, rënia më e lartë që nga ribashkimi në 1990, sipas Les Échoes. Megjithatë, kjo ulje është pjesërisht e lidhur me situatën e keqe ekonomike në Gjermani, veçanërisht në industritë që konsumojnë shumë energji. Kështu, prodhimi në sektorin e kimikateve është 20% më i ulët se niveli i tij para Covid-it.

Disa faktorë të tjerë shpjegojnë rënien në Gjermani: rënia e prodhimit të qymyrit, zhvillimi i energjive të rinovueshme dhe dekarbonizimi i industrisë, por edhe dimri i butë dhe erozioni i fuqisë blerëse të popullsisë. Sipas Agjencisë Federale të Mjedisit, vendi ka reduktuar tashmë emetimet e gazrave serrë me 46% krahasuar me nivelin e tyre të vitit 1990. Objektivat përfundimtarë janë një reduktim prej 65% deri në vitin 2030 dhe më pas neutraliteti i karbonit në 2045.

Spanja mund të mburret se ka kaluar pragun e 50% të energjisë së rinovueshme në prodhimin e saj të energjisë. Por, pavarësisht nga një rënie e fundit, emetimet e CO2 të vendit kanë filluar të rriten përsëri që nga viti 2021 dhe janë ulur vetëm me 2% që nga viti 1990, sipas Les Échos. A do të ketë sukses Europa në tërësi në arritjen e objektivit të saj? Sipas një publikimi nga Komisioni Evropian, i botuar në fund të vitit 2023 dhe i cituar nga gazeta franceze Le Monde, masat e marra nga vendet anëtare do të lejonin një reduktim prej 51% të emetimeve deri në vitin 2030, krahasuar me një objektiv prej 55%.

Agjencia Europiane e Mjedisit thekson se “reduktimet më të shpejta janë veçanërisht të nevojshme për emetimet nga transporti rrugor, ndërtesat, bujqësia, mbeturinat dhe industritë e vogla”. Agjencia përmend gjithashtu nevojën për të përshpejtuar “reduktimet në konsumin e energjisë dhe rritjen e energjive të rinovueshme”, në mënyrë që të respektohen objektivat për vitin 2030 të përcaktuara nga direktivat evropiane për efiçencën e energjisë dhe energjitë e rinovueshme.

Ekonomia më e madhe në botë dhe emetuesi i dytë më i madh i gazrave serrë, Shtetet e Bashkuara njoftuan gjithashtu rezultate të mira në frontin e CO2, me një rënie të emetimeve prej 1.9% në 2023 krahasuar me 2022. Les Échos vë në dukje, megjithatë, se Shtetet e Bashkuara do të duhet të trefishojnë përpjekjet e tyre për të arritur objektivin e tyre për të reduktuar emetimet me 50% në vitin 2030 krahasuar me 2005. Një ushtrim që është edhe më i vështirë pasi Shtetet e Bashkuara aktualisht po rinisin prodhimin e tyre të hidrokarbureve .

Për shkak të rritjes më të fuqishme ekonomike, vendet në zhvillim, nga ana tjetër, vazhdojnë të rrisin emetimet e tyre të CO2. Në vitin 2024, këto pritet të rriten me 8.2% në Indi dhe 4% në Kinë, sipas të njëjtave media. Për më tepër, midis një konteksti të tensionuar gjeopolitik dhe shqetësimeve të qytetarëve për fuqinë e tyre blerëse, frika e një hapi prapa në politikat mjedisore është gjithnjë e më e fortë. E konsideruar prej kohësh një model për ekologjinë, Suedia kohët e fundit anuloi një sërë masash në këtë fushë, të tilla si shpërblimet për lëvizshmërinë e pastër (bashkimi i automjeteve, transporti publik) dhe energjia e erës në det të hapur.

Një shenjë qetësuese: rritja e burimeve të rinovueshme në prodhimin global të energjisë. “Me gjithë infrastrukturën e planifikuar, kapaciteti prodhues është aty, të gjitha vendimet duhet të materializohen, por nëse është kështu, objektivi mund të arrihet,” vlerëson Lola Vallejo, e Institutit të Zhvillimit të Qëndrueshëm dhe marrëdhënieve ndërkombëtare, cituar nga Les. Échos. Sipas të dhënave nga Projekti Global i Karbonit, emetimet globale të GHG u rritën me 1.1% në vitin 2023 në 36.8 miliardë ton. Rruga drejt neutralitetit të karbonit është ende e gjatë!

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.