Reja e zezë mbi ekonominë e kontinentit të vjetër – Analistët shohin detajet dhe paralajmërojnë për rrezikun

Shifrat që kanë dalë në dritë javët e fundit kanë lehtësuar tregjet dhe nuk janë të paktë ata që argumentojnë se më e keqja për Europën ka mbaruar: aksionet europiane – pavarësisht tronditjeve të ditëve të fundit – janë rritur me 30%. Që nga tetori i kaluar, bursat duket se i kanë shpëtuar kolapsit të Credit Suisse, ndërkohë që euro mbetet në rritje.

Në fakt, raportet e analistëve vlerësojnë se ekonomia në eurozonë do të shmangë recesionin, pavarësisht rritjes agresive të normave të interesit për të frenuar inflacionin dhe do të kufizohet në një ulje më të butë. Në të njëjtin kontekst, kriza energjetike, me motin e mirë si aleat, po zbutet. Ndërsa e ardhmja europiane e gazit është kthyer në nivelet e para pushtimit. Dhe shifrat e publikuara nga Eurostat tregojnë se ekonomia ka fuqi dhe po rimëkëmbet më shpejt se parashikimet, ndërkohë që inflacioni është i përmbajtur.

Deri këtu mirë… Megjithatë, ka një njollë të zezë që është pararojë e gjërave të këqija: oferta monetare në Eurozonë është në rënie të lirë dhe nëse ky trend vazhdon në muajt në vijim, mund ta kthejë përmbys panoramën aktuale. Të dhënat e Bankës Qendrore Europiane tregojnë se paraja “e shtrënguar” M1 ka ardhur duke u tkurrur që nga shtatori i kaluar në terma absolutë. Indeksi M1 është i barabartë me monedhën në qarkullim plus depozitat njëditore. Këto të fundit janë të barabarta me shumën e llogarive rrjedhëse.

Një situatë e tillë nuk është parë që nga krijimi i euros. Norma vjetore e rritjes nuk ra kurrë nën zero edhe gjatë krizës Lehman dhe krizës së borxhit të Eurozonës. Përveç kësaj, shkalla e tkurrjes është përshpejtuar. Gjatë pesë muajve të fundit, indeksi M1 i eurozonës ka rënë me një normë prej 12% (vjetor).

Anketa tremujore e BQE-së për huadhënien bankare në janar tregoi se “shtrëngimi neto i standardeve të kredisë ishte më i madhi i raportuar që nga kriza e borxhit sovran të eurozonës në 2011”. Kjo është veçanërisht e dëmshme në eurozonë, ku tregjet e kapitalit janë bllokuar dhe bankat ende përbëjnë pjesën kryesore të kreditimit.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.