Rekord remitancash në Kosovë – Për vitin 2023, dërgesat e emigrantëve arritën në 1,344 miliardë euro

Dërgesat e emigrantëve në Kosovë për vitin 2023 regjistruan një rekord për të paktën gjashtë vitet e fundit. Të dhënat e publikuara nga Banka Qendrore e Kosovës tregojnë se dërgesat e emigrantëve për vitin që sapo u mbyll arritën vlerën prej rreth 1,344.5 miliardë euro, me një rritje vjetore prej 10%.

Nëse analizojmë ecurinë e remitancave që nga viti 2018, vërehet një rritje e mprehtë nga viti në vit, që kulmoi në 2023-shin. Dërgesat e emigrantëve janë një ndër burimet kryesore të jetesës së familjeve në Kosovë, në kushtet kur rritjet e çmimeve të mallrave të konsumit nuk njohin ndalje.

Sipas vlerësimeve paraprake të Bankës Qendrore, remitancat për muajin dhjetor ishin rreth 129.1 milionë euro. Ndërkohë, prurjet më të mëdha edhe gjatë këtij muaji kanë qenë përmes institucioneve financiare jobanka me 49.9%, kanalet e tjera 36.7%, ndërsa përmes bankave komerciale 13.3%.

Referuar të gjithë vitit kalendarik 2023, gushti ishte muaji në të cilin u regjistrua një vlerë rekord e remitancave me 141,7 milionë euro, çka lidhet edhe me rikthimin në atdhe të emigrantëve për pushimet verore. (tab1) Ndërkohë, e njëjta gjë mund të thuhet edhe për dhjetorin, muaji me vlerën e dytë më të lartë vjetore.

Sipas të dhënave, remitancat në Kosovë vijojnë të vijnë kryesisht nga Gjermania dhe Zvicra, që përbëjnë rreth 55% të totalit, ndjekur nga SHBA dhe vendet e tjera të Eurozonës.

Duke konsideruar që pjesa me e madhe e remitancave jane me origjinë nga vendet e Eurozonës, rreth 60% e tyre, Banka Qendrore parashikon se ngadalësimi i aktivitetit ekonomik në Eurozonë dhe pasiguritë e rritura mund të kenë implikime mbi këtë zë të rëndësishëm për ekonominë e Kosovës.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.