Rriten çmimet e naftës – Shkak shqetësimet për tkurrje të furnizimit

Çmimet e naftës u rritën deri në 1 dollar për fuçi të enjten, pasi ranë nën nivelet kryesore të mbështetjes teknike në seancën e mëparshme. Shkak për rritjen e çmimit është bërë kërcënimi i presidentit rus Vladimir Putin për të ndalur eksportet e naftës dhe gazit nëse vendosen kufij të çmimeve nga blerësit europianë.

Bashkimi Europian propozoi kufizimin e çmimeve të gazit rus vetëm disa orë më vonë, duke rritur rrezikun e racionimit në disa nga vendet më të pasura të botës këtë dimër, nëse Moska zbaton kërcënimin e saj. Gazprom tashmë ka ndalur flukset nga gazsjellësi Nord Stream 1, duke ndërprerë një përqindje të konsiderueshme të furnizimit në Europë.

Kontratat e së ardhmes së naftës së papërpunuar Brent fituan 63 cent, në 88.63 dollarë për fuçi, ndërsa kontratat e së ardhmes së naftës së papërpunuar amerikane u rritën me 70 cent, në 82.64 dollarë për fuçi.

Sipas analistëve të tregut, ndikimi i mundshëm i çdo marrëveshjeje midis Perëndimit dhe Iranit mbi programin bërthamor të Teheranit do të ishte gjithashtu i rëndësishëm. Një marrëveshje do të hiqte sanksionet ndaj eksporteve të naftës iraniane.

Qeveria britanike pritet të shpallë dhjetëra licenca të reja për kërkimin e naftës dhe gazit të Detit të Veriut në një përpjekje për të rritur prodhimin vendas. Ndërkohë, një numër bankash qendrore në mbarë botën pritet të fillojnë një raund të ri të rritjes së normave të interesit për të luftuar inflacionin.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.