“Rriten shkëmbimet tregtare me Izraelin” – Balluku: Marrëveshje për lehtësimin e procedurave të biznesit për investitorët

Shkëmbimet tregtare mes Shqipërisë dhe Izraelit janë rritur në 3 vitet e fundit. Gjatë fjalës së mbajtur në forumin e biznesit Shqipëri-Izrael, zëvendëskryeministrja dhe ministrja e Infrastrukturës dhe Energjisë, Belinda Balluku theksoi perspektivën e zhvillimit të mëtjshëm të bashkëpunimit mes 2 vendeve.

“Nga të dhënat që më janë referuar nga institucionet shtetërore shqiptare rezulton se shkëmbimet tregtare midis dy vendeve tona për vitin 2021 ishin 40 milionë euro, ndërkohë të realizuara për vitin 2022 kanë qenë 57 milionë euro. Për periudhën 6 mujore të 2023-it kemi arritur në 21 milionë euro dhe unë shpresoj që të tejkalojmë atë të vitit 2022, pasi kjo është sfida jonë. Numra më të rritur nga vitit në vit, punë të tjera të mbaruara nga viti në vit, rezultate të prekshme nga viti në vit”.

Balluku bëri me dije se shumë shpejt do të firmoset një marrëveshje për të lehtësuar procedurat e të bërit biznes.

“Ne kemi arritur së bashku edhe në një rezultat të shkëlqyer për të pasur një ‘government-to-government agreement’ të cilën do ta firmosim në muajt në vazhdim, duke i hapur kështu dhe duke facilituar rrugën për të gjitha bizneset izraelite që duan të investojnë në Shqipëri dhe për të gjitha këto biznese shqiptare që duan të investojnë në Izrael”.

Fushat ku aktualisht ka më shumë bashkëpunim janë bujqësia, energjia dhe inovacioni. Ndërkohë, që ka rritje të interesit nga bizneset izraelite edhe për fushën e infrastrukturës.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.