Rritet çmimi i banesave të reja në Malin e Zi – Mesatarja në tremujorin e dytë të këtij viti është 1.375 euro për metër katror

Sipas të dhënave më të fundit, çmimi mesatar për metër katror i një apartamenti të ri në Mal të Zi është 1.375 euro, në tremujorin e dytë të këtij viti. Në Podgoricë çmimi është 1.393 euro për metër katror, ndërsa në bregdet çmimi është dhe më i lartë; 1.473 euro për metër katror.

Nëse zhvendosemi në qendër të vendit çmimet pësojnë ulje të ndjeshme me 611 euro metër katror ndërsa në veri 915 euro. Çmimi mesatar i apartamenteve në një ndërtesë të re banimi varet ndjeshëm nga lëvizja e çmimeve të banesave ekzistuese, apartamente të cilët janë shitur më shumë se një herë.

Sipas metodologjisë së vrojtimit “Çmimet e apartamenteve në ndërtesat e reja të banimit” për llogaritjen e çmimit mesatar për metër katror të banesave në një ndërtesë të re, merren vetëm banesat që janë shitur në treg për herë të parë, ose për të cilat për herë të parë lidhet një kontratë blerjeje.

Objekt i këtij anketimi nuk janë banesat ekzistuese  – të vjetra, si dhe llojet e tjera të pasurive të paluajtshme: objekte biznesi, toka dhe të tjera. Vrojtimi nuk pasqyron ofertën dhe kërkesën e banesave të reja në treg, por çmimet e llogaritura në bazë të kontratave të shitjes.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.