Rritet eficienca e energjisë në nivel global – Një nga arsyet kryesore, çmimet e larta të energjisë dhe kriza e naftës
Progresi global drejt eficiencës energjetike është përshpejtuar këtë vit si rezultat i çmimeve të larta të energjisë dhe ndërprerjeve të furnizimit me karburant. Por gjithësesi ende jo mjaftueshëm për të përmbushur objektivat e ndryshimeve klimatike, sipas deklaratës së Agjencisë Ndërkombëtare të Energjisë.
Mbikëqyrësi me bazë në Paris i bëri apel qeverive që t’i japin përparësi përpjekjeve për të përmirësuar eficiencën e energjisë në ndërtesa dhe transport, pasi ambiciet për të reduktuar emetimet dhe për të frenuar temperaturat në rritje nuk mund të përmbushen duke u fokuzuar vetëm në prodhimin e energjisë së rinovueshme.
Në një deklaratë për media kreu i kësaj agjencie, Fatih Birol u shpreh se kriza e naftës në vitet 1970 shkaktoi një presion masiv nga ana e qeverive për eficiencën e energjisë. Kjo dha rezultat në përmirësime thelbësore në eficiencën energjetike të automjeteve, pajisjeve dhe ndërtesave.
Ai shtoi se në krizën aktuale energjetike po shihen sinjale se eficienca e energjisë është sërish një prioritet. Të dhënat paraprake tregojnë se investimet globale në eficiencën e energjisë si për shembull izolimi i ndërtesave, do të rriten me 16% – 560 miliard dollarë këtë vit.
Investimet kanë bërë që energjia të përdoret rreth 2% në mënyrë më efikase këtë vit në krahasim me një vit më parë, pothuajse dyfishi i normës së pesë viteve të fundit, por më pak se mesatarja 4% në vit. Kjo është dhe përqindja që duhet për këtë dekadë për të përmbushur objektivin e emetimeve zero deri në vitin 2050.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.