Rritet hendeku i pagave në SHBA – Në vitin 2021 fenomeni ishte më i ndjeshëm në kompanitë me paga të ulëta

Hendeku i pagave mes punëtoreve dhe drejtorëve ekzekutivë në 300 kompani me paga të ulëta në Shtetet e Bashkuara të Amerikës, është rritur dhe më shumë në vitin 2021. Të dhënat u konfirmuan nga një studim i Institutit për Studimet e Politikave.

Hendeku mesatar rezultoi 670 me 1, nga 604 në 1 të një viti më parë, ndërsa 49 kompani kishin raport mbi 1000 me 1, sipas studimit. Paga mesatare e drejtorëve ekzekutivë në grup u rrit me 2.5 milionë dollarë në 10.6 milionë dollarë, ndërsa paga mesatare e punëtorëve u rrit 3.556 dollarë në 23.968 dollarë.

Këto përfundime do të shërbejnë në mënyrë që investitorët të përqendrohen dhe më shumë në kauzat e drejtësisë sociale si pjesë e agjendës së tyre mjedisore, sociale dhe të qeverisjes- ESG. Korporatat amerikane përballen me një valë të paprecedentë vendimesh të aksionerëve për këto çështje; dhe trajtimi i punëtorëve është një nga çështjet më të diskutuara.

Sipas Sarah Anderson, drejtoreshë në Projektin për Ekonominë globale, gjatë pandemisë punëtorët me paga të ulëta kanë treguar se sa thelbësorë janë ata për funksionimin e ekonomisë. Me rritjen e fitimeve në vitin 2021, korporatat patën një mundësi për të bërë një hap të madh drejt barazisë më të madhe të pagave, shtoi ajo.

Studimi zbuloi se në 106 prej kompanive, paga mesatare e punëtorëve nuk arriti të mbante ritmin me normën mesatare të inflacionit prej 4.7% në Shtetet e Bashkuara të Amerikës. Nga ky grup, 67 kompani shpenzuan së bashku 43.7 miliardë dollarë për blerjen e aksioneve gjatë kësaj periudhe, duke rritur pagën e drejtorëve ekzekutivë,  bazuar në aksione.

Si pasojë, një numër në rritje i punëtorëve po marrin situatën në dorë dhe po përpiqen të zhvendosin vendet e punës në kërkim të pagave më të mira, kushteve të punës ose ekuilibrit mes punës dhe jetës, si pjesë e një fenomeni që aktualisht njihet si “Dorëheqja e Madhe”.

Një sondazh global në muajin mars nga konsulentët PwC zbuloi se një në pesë punëtorë kishte “jashtëzakonisht” ose “shumë të ngjarë” të ndryshonte punëdhënësin në 12 muajt e ardhshëm.

Pandemia e COVID-19 ka çuar në rritjen e vëmendjes nga investitorët në mënyrën se si kompanitë trajtojnë stafin e tyre, megjithëse, siç u pa në takimin vjetor të fundit të Amazon, shumë prej tyre kanë kritikuar menaxherët për çështje të tilla.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.