Rritja e Bonove fut në “lojë” bankat, rrisin interesat e depozitave – Në janar 2023 shkojnë deri 3.8% normat për depozitat 60-mujore, deri 3.5% 2-vjeçaret
Jo vetëm bonot e thesarit, por edhe interesat e depozitave po reflektojnë tashmë rritjet e njëpasnjëshme të normës bazë nga ana e Bankës së Shqipërisë. Përgjatë gjysmës së dytë të vitit të shkuar bankat kanë rritur veçanërisht interesat e depozitave afatgjata. Interesi mesatar për depozitat me afat në lekë ka arritur në 1.5% në muajin dhjetor, me një rritje kumulative prej 0.9 pikë përqindje krahasuar me mesataren e tremujorit të parë të vitit.
Të njëjtën tendencë kanë shfaqur edhe interesat e depozitave në euro, të cilat kanë arritur në 0.7% në muajin dhjetor, nga nivelet nën 0.2% të katër viteve të mëparshëm. Interesat e depozitave në lekë dhe ato në euro po rriten thuajse me të njëjtën shpejtësi, duke ruajtur diferencën mes tyre pranë mesatares prej 0.5 pikë përqindjeje të tre viteve të mëparshme.
Ndërkohë nga të dhënat zyrtare të Bankës së Shqipërisë për muajin janar, raportohen interesa deri në 3.5% për depozitat dy vjeçare. Po ashtu, të paktën 4 banka të nivelit të dytë propozojnë interesa mbi 3.5% për depozita me afat mbi 60 muaj. Për depozitat me afat 1 vjeçar gjenden në treg oferta deri 3%.
Kjo tendencë ka shtyrë veçanërisht individët të transferojnë kursimet drejt depozitave me afat. Për vitin që sapo lamë pas, ngadalësimi i normave të rritjes vjetore të depozitave pa afat në 11.6% (22% në fillim të vitit), është kompensuar nga forcimi i ritmeve të rritjes së depozitave me afat në 6.6% (2.7% në fillim të vitit).
Kontribuuesi kryesor në këtë ecuri ka qenë rritja e fortë e depozitave mbi dy vjet, rritje e cila është përforcuar më shumë mbas muajve të verës. Zhvendosja e kursimeve drejt depozitave me afat me maturitete të gjata, si në lekë ashtu edhe në valutë, është e ndikuar nga ofertat e shumta të bankave në këto produkte, por edhe nga preferenca e individëve për kthime më të larta.
Lorenc Rabeta/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.