75 mln dollarë për ujësjellës-kanalizimet – Huaja e Bankës Ndërkombëtare për Rindërtim dhe Zhvillim synon modernizimin e sektorit

Një hua prej 75 milionë dollarë nga Banka Ndërkombëtare për Rindërtim dhe Zhvillim synon modernizimin e sektorit të ujësjellës-kanalizimeve në Shqipëri. Marrëveshja, që është dërguar për ratifikim në Kuvend, parashikon përmirësimin e performancës operative dhe financiare të shoqërive ujësjellës-kanalizimeve.

Raporti kombëtar mesatar i rikuperimit të kostos operacionale pritet të përmirësohet me 10% (nga rreth 81%, në 91%). Gjithashtu, pritet përmirësimi i furnizimit me ujë në 35 zona të reja urbane për të marrë furnizim me ujë minimalisht prej 18 orësh.

Pritet që programi të mund të sigurojë financim për rreth 10 000 deri në 12 000 lidhje të reja familjare (duke përfituar rreth 40 000-50 000 njerëz), që do të thotë një ulje e hendekut aktual të mbulimit me shërbime ujësjellës me rreth 3%.

Ndër të tjera, pritet të ndërhyhet edhe në performancën operacionale dhe financiare të shërbimeve, duke vendosur një sistem të rishikuar të grantit të bazuar në performancë për qëndrueshmërinë financiare, projekte për përmirësimin e efikasitetit dhe performancës, si dhe hartimin e paketave stimuluese për proceset e rajonizimit të shërbimeve të ofruara nga shoqëritë e ujësjellës-kanalizimeve nëpërmjet krijimit të njësive rajonale.

Dorian Koça/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.