Rritja e sigurisë në rrugë – ARRSH, 83.3 mln lekë tender për eleminimin e pikave të zeza

83.3 mln lekë është vlera e një procedure prokurimi publik, që pritet të hapet nga Autoriteti Rrugor Shqiptar për eleminimin e pikave të zeza në rrugë. Ende nuk dihet se cilat janë vendet e evidentuar si burim aksidenti, ndërkohë që tenderi parashikohet të hapen në muajt në vijim, duke përcaktuar elementët e sigurisë dhe ndërhyrjet përkatëse që do të kryhen.

Kjo nuk është hera e parë, që ARRSH zhvillon një tender për rritjen e sigurisë në rrugë, duke patur në fokus ato pjesë të rrjetit rrugor kombëtar, që paraqesin rrezikshmëri më të lartë. Ndërkohë që, në raport me një viti më parë ka një rritje të buxhetit për këtë qëllim, duke qenë se vitin që shkoi vlera e parashikuar nga ARRSH ishte 45.3 mln lekë.

Në fakt, nevoja për rritjen e sigurisë në rrugë është e madhe, duke marrë në konsideratë se numri i aksidenteve dhe i personave të aksidentuar pësoi rritje gjatë vitit 2023, në raport me një vit më parë. Sipas të dhënave nga Instituti i Statistikave, gjatë vitit që shkoi u shënuan 1285 aksidente rrugore, apo 10.3% më shumë në raport me vitin 2022, ku u shënuan 1165 aksidente. Nga këto aksidente, në vitin 2023 mbetën të vrarë apo të plagosur 1731 qytetarë, ndërsa në vitin 2022, 1599 qytetarë.

Ola Mitre/SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.