Rritje rekord në shpenzimet ushtarake të BE-së – Ky është viti i tetë radhazi!

Shpenzimet ushtarake në Bashkimin Europian arritën një rekord prej 240 miliardë euro në vitin 2022, 6% më shumë se një vit më parë, tha të enjten Agjencia Europiane e Mbrojtjes (EDA).

Ky është viti i tetë radhazi i rritjes në bllok, me shumë shtete që mbrojnë nevojën për një rritje të konsiderueshme për shkak të kërcënimit rus dhe luftës në Ukrainë.

Gjashtë nga 27 vende të BE-së rritën shpenzimet e tyre ushtarake me më shumë se 10% vitin e kaluar. Suedia pa një rritje prej më shumë se 30%, ndërsa vendi pret anëtarësimin në NATO. Megjithatë, disa vende e kundërshtuan trendin. Franca vetëm rriti shpenzimet e saj ushtarake me 0.7% në 2022.

Vendet e BE-së në tërësi i kushtuan 1.5% të prodhimit të tyre të brendshëm bruto (PBB) sektorit të mbrojtjes, shumë më poshtë objektivit prej 2% të vendosur nga NATO, e cila përfshin 22 anëtarë të BE-së.

Rreth 58 miliardë euro u investuan në sektorin e mbrojtjes, tha EDA, një agjenci përgjegjëse për përmirësimin e aftësive mbrojtëse në bllok. Pavarësisht rritjes së shpenzimeve, industria e mbrojtjes e Europës nuk mund të plotësojë kërkesën nga Ukraina ndërsa lufton me pushtimin rus.

Europianët janë zotuar të furnizojnë Kievin me një milion predha deri në mars, megjithëse ky objektiv ambicioz tashmë duket i paarritshëm.

“Forcat tona të armatosura duhet të jenë të gatshme për të përballuar kohë shumë më të vështira,” citohet të ketë thënë kryediplomati i BE-së Josep Borrell në një deklaratë për shtyp të EDA. Megjithatë, ai pranoi se kishte “boshllëqe të rëndësishme” në kapacitetin mbrojtës të bllokut.

“Ne vazhdojmë të mbeten prapa lojtarëve të tjerë”, tha Borrell. Rusia planifikon të rrisë shpenzimet e saj ushtarake me 67% në 2024 – duke përfaqësuar rreth 30% të PBB-së së saj.

Shpenzimet për kërkimin dhe zhvillimin e mbrojtjes në BE u ulën 200 milionë euro në 2022 krahasuar me vitin e kaluar në 3.5 miliardë euro, sipas EDA.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.